A

Жижиг

A

Дунд

A

Том
http://zgm.mn/post/4122/

Бусдын сайн сайханд хувь нэмрээ оруулж буйдаа баяртай байдаг

Бусдын сайн сайханд хувь нэмрээ оруулж буйдаа баяртай байдаг
 1 сэтгэгдэл

A

Жижиг

A

Дунд

A

Том
http://zgm.mn/post/4122/
  • Бид өдрийн ихэнх цагийг хамт өнгөрөөдөг учир нэг гэр бүл шиг л дотно
  • Орчин нөхцөл сайтай тул бид ажлаас хойш суудаггүй. Цаг, нар бүр ч хамаагүй. Манайхан ажилтай, захиалгатай л бол сайхан гэдэг хүмүүс 
  • Xэрэгцээ шаардлагад нь нийцүүлэн, судалгаанд үндэс, бараа бүтээгдэхүүнээ урлаж байна

Өрхийн бизнес эрхлэх сонирхолтой эмзэг бүлгийн ээжүүдэд ажлын байр бий болгож буй “Ховор угалз” эмэгтэйчүүд хөгжлийн төвийн үйл ажиллагаатай танилцахаар тус төвийг зорилоо. Өрх толгойлсон, өндөр настай, хөгжлийн бэрхшээлтэй, бага насны хүүхэдтэй зэрэг хөдөлмөр эрхлэх боломж хязгаарлагдмал эмэгтэйчүүдийг монгол гутал урлах, эсгий, ноосоор бүтээгдэхүүн гаргах зэрэг ур чадварт үнэ төлбөргүй сургаж, ажлын байр олгодог энэхүү төвд нийт 60 гаруй эмэгтэй үйлдвэрлэл эрхэлдэг. Тэднийг үйл ажиллагааг СХД-ийн Засаг даргын тамгын газраас дэмжиж, 145 метр квадрат талбай бүхий гурван өрөө байраар хангажээ.

Ажлын байраа хувийн сууц шиг тохижуулжээ

Биднийг зорьсон газраа хүрч, үүдээр нь ормогц нас, насны эмэгтэйчүүд тус, тусын үйлийг хийгээд, тун завгүй байлаа. Түүнчлэн, ажлын байрныхаа хана, шалыг өнгө, өнгийн эсгий, ноосон хивсээр чимсэн байх бөгөөд сувд, шүр бүхий чамин зүүсгэл энд тэндгүй өлгөсөн харагдана. Мэнд мэдээд, цааш алхтал ижил өнгийн цамцаар гоёж, эсгий шаахай өмссөн эмэгтэйчүүд “улавч өмсөөрэй” гэв. Ингэхдээ “бид энд гэртээ байгаа юм шиг л тухалдаг учир гаднын гутал, хувцастай байдаггүй юм. Мөн ихэнх нь хүүхэдтэйгээ ирдэг учир ариун цэвэр маш чухал” хэмээн тайлбарлав. Үнэхээр ч тэд ажлын байраа оффис гэхээс илүү гэр орон шигээ тохижуулжээ. Тун тохилог бөгөөд цэвэрхэн энэ байшинд ажилчид өдрийн ихэнх цагийг өнгөрөөдөг бөгөөд усанд орох, угаалга хийх зэрэг ахуйн ариун цэврийг ч мөн сахидаг аж. Энэ талаар “Монгол угалз” урлаачдын холбооны гүйцэтгэх захирал Ж.Жавзан “Манай ажилчид ажилдаа их дуртай. Дуртай зүйлээ хийж байгаа тул өглөө ирээд, шөнө л харьдаг. Зарим үед эндээ хонох нь ч бий. Мөн ихэнх нь үр хүүхэд, ач зээ нараа аваад ирдэг учир хүүхдийн өрөө гаргаж, тохижуулсан юм. Дэвсгэр, хөнжил, тоглоом, наадгай, сандлын бүтээлэг, ханын чимэглэл зэрэг бүх л зүйлийг бид өөрсдөө урлаж, эсгэсэн. Мөн ажилчдад болон хүүхдүүдэд өдөрт гурван удаа хоол хийж өгдөг юм. Үүнээс гадна, угаалгын машин, улавч, шаахай, алчуур саван зэрэг ахуйн хэрэглээний бүх л зүйл манай төвд бий. Тиймээс бид эндээ усанд ороод, угаалгаа хийчихдэг. Эгч нь 70 насны босго давсан хүн. Өдий хүртэл ажиллаж, амьдрахдаа ийм ажлын байр, хамт олон үзээгүй. Орчин нөхцөл сайтай тул бид ажлаас хойш суудаггүй. Цаг, нар бүр ч хамаагүй. Хэт оройтчихвол зарим нь эндээ хононо, заримыг нь захирал хүргээд өгчихдөг. Манайхан ажилтай, захиалгатай л бол сайхан гэдэг хүмүүс. Мөн өдрийн ихэнх цагийг хамт өнгөрөөдөг учир бид нэг гэр бүл шиг л дотно болчихсон. Хүүхдүүд минь хүртэл бие, биетэйгээ нөхөрлөж, гар урлалтай ойр өсөж байна” хэмээн ажлын байраа танилцууллаа. Гар урлал хийж буй ажилчид бүтээсэн бүтээл, гаргасан урла­лаараа цалинждаг аж. Тухайлбал, гутлын хээ гаргах, хэв дарах, эсгий өнгө, хэлбэрт оруулах зэрэг үйл бүхэн тодорхой тарифтай. Түүнчлэн хэн юу хийхээ ажилчид өөрсдөө сонгож, санал гаргадаг бөгөөд тогтсон ажлын цаггүй учир аль завтай үедээ ирээд ажиллах боломжтой аж. Харин захиалсан бүтээгдэхүүнийг цагт нь өгснөөр тэдний ажлын бүтээмж хэмжигддэг байна. СХД-­ийн 20 дугаар хорооны иргэн Н.Нямсүрэн “Манай гэр эндээс хоёр гудамжны зайд байдаг. Би өглөө зээ охиноо цэцэрлэгт нь хүргэж өгчихөөд ажилдаа ирдэг юм. Одоо сургууль амарчихсан тул охиноо авч ирээд ажиллаж байна. Заавал өглөө 9:00 гэж ирээд орой тарах ёстой гэсэн дүрэм, журамгүй учир их амар. Зарим захиалга цагтаа багтахгүй болчихвол гэрлүүгээ авч яваад хийх нь ч бий” гэлээ. 

1000 гаруй хүнд өөрийн ур чадварыг өвлүүлэн, эзэмшүүлсэн 

60 орчим хүнийг ажлын бай­раар хангаж, олон мянган ээжийг урлах, эсгэх эрдэмд сургаж буй тус төвийн захирал М.Сувд-Эрдэнэ гар урлалын чиглэлээр мэргэшээд 20 ор­чим жил болж байгаа аж. Түүнчлэн энэ хугацаанд 1000 гаруй хүнд өөрийн ур чадварыг өвлүүлэн, эзэмшүүлсэн төдийгүй “Дэлхийн зөн” олон улсын байгууллагатай хамтарч, хөдөө орон нутгийн эмэгтэйчүүдэд ч ажил, орлогын шинэ боломж нээж өгдөг байна. Түүний нө­хөр Я.Баттулга шинэ зүйл сурахаар ирсэн бүсгүйчүүдэд эсгийгээр бүтээгдэхүүн урлахыг заадаг бөгөөд загвар зохион бүтээдэг байна. Автын инженер мэргэжилтэй тэрбээр урлах эсгэх чиглэлээр ажиллаад 10 орчим жил болж байгаа аж. Я.Баттулга “Эхнэрийгээ шөнө, үдэшгүй арьс, эсгий бариад суухад нь дургүйцдэг л байлаа. Гэтэл нэг мэдэхэд өөрөө өглөө, үдшийг ялгалгүй эсгий нухаж, элдэв дүрс зурж суудаг болсон. Бидний ур ухаан, сэтгэл зүрхээ шингээж хийсэн бүтээлийг хүмүүс хэрэглэж, сэтгэлийн таашаал авна гэдэг хамгийн сайхан. Мөн олон шавьтай болсон. Сургалтад суугаад гарсан шавь нар маань гутал урлаж, эсгийгээр бүтээл хийгээд борлуулсан мөнгөөрөө машинаа томруулсан, малаа өсгөсөн гэх нь л хамгийн сайхан санагддаг. Бусдын амьд­ралын сайн, сайханд хувь нэмрээ оруулж байгаадаа баяртай байдаг юм” хэмээв.

Бүтээгдэхүүнээ олон улсын болон орон нутгийн зах зээлд нийлүүлж эхэлжээ 

“Ховор угалз” эмэгтэйчүүд хөгжлийн төв хэрэглэгчдийн захиалгаар бүтээгдэхүүн урлаад зогсохгүй гадаадын болон орон нутгийн зах зээлд хөл тавиад эхэлжээ. Энэ талаар “Ховор угалз” эмэгтэйчүүд хөгжлийн төвийн захирал М.Сувд­-Эрдэнэ “Бид зөвхөн нийслэлийн хэрэглэгчдэд бүтээг­дэхүүнээ хүргээд зогсохгүй олон улсын болон орон нутгийн зах зээлд хөл тавиад эхэлсэн. Ингэхдээ хэрэгцээ шаардлагад нь нийцүүлэн, судал­гаанд үндэслэн, бараа бүтээгдэхүүнээ урлаж байна. Жишээ нь Өвөрмонгол хүмүүс ширмэл ширдэг, эсгий гутал хэрэглэх сонирхолтой байдаг бол япончууд өнгө, загварт нь илүү ач холбогдол өгдөг. Харин БНХАУ-­ын иргэд дулаан, тохитойд нь татагддаг. Цаашдаа бид хүрээгээ улам тэлж, илүү олон улсад хүрэхээр ажиллаж байна. Мөн сургалтад хамрагдах сонир­холтой хүний тоо ч өссөөр байна. Бид өмнө нь Баянхошууны эцэст сургалтаа зохион байгуулж, үйлд­вэрлэлээ эрхэлдэг байсан юм. Харин иргэдээ ажилтай, орлоготой байл­гах үүднээс дүүргийн Засаг даргын тамгын газраас биднийг энэ байраар хангасан. Тохилог сууцтай, хүмүүст ойр болчихоор худалдан авалт ч, сургалтад сууж, ажиллах сонирхолтой хүмүүс ч нэмэгдэж байна” хэмээлээ. “Ховор угалз” төв нь нярай хүүхэдтэй, хөгжлийн бэрхшээлтэй зэрэг гэрээс гарах боломжгүй эмэгтэйчүүдийг гэртээ ажиллаж, орлого олох боломжоор хангадаг байна. Ингэхдээ, ширдэг ширэх, гутлын хээ гаргах зэрэг гар аргаар үйлдвэрлэх боломжтой зүйлийг гэрт нь хүргэж өгдөг байна.

Хонины ноосоор амны хаалт үйлдвэрлэж байна

 “Ховор угалз” эмэгтэйчүүд хөгжлийн төв амны хаалт үйлдвэрлэхээр туршиж байна. Ингэхдээ эсгий, ноос ашиглаж байгаа аж. Тэд амны хаалтын дотор байрлах шүүлтүүрийг цэнхэр спиртээр ариутган, эсгий­рүүлсэн хонины ноосоор хийжээ. Харин гадна талыг нь давуугаар оёсон бөгөөд урд нь зориулалтын шүүлтүүр байршуулжээ. Энэ нь агаар гадагш нэвтрүүлдэггүй бөгөөд гаднах бохирдлыг шүүж, үлддэг онцлогтой аж. Энэ талаар М.Сувд-­Эрдэнэ “Японд автома­шины агаар шүүгчийг хонины ноосоор хийдэг. Тиймээс амны хаалтын шүүлтүүрийг ч мөн энэ аргаар хийж болох юм гэж бодогдсон. Хонины ноосны бүтэц шигүү хэдий ч агаар нэвтрүүлэх чадвар сайтай. Мөн гадны үйлдвэрлэж буй амны хаалт агаар нэвтрүүлэх чадвар муу тул дотор тал нь чийгтэх, шил цантах зэрэг хүндрэл үүсдэг. Харин ноосон шүүлтүүртэй маск гадагш агаар нэвтрүүлэх чадвар сайтай тул шил цантахгүй. Бид туршиж үзсэн” хэмээлээ. Тэд энэхүү санаагаа төрийн байгууллагуудад уламжлан, үйлдвэрлэх эрх авахаар ажиллаж буй гэнэ. Харин одоогоор зах зээлд гаргаж эхлээгүй тул борлуулах үнэ тодорхойгүй байв. Ажил хийхийг хүссэн хэн хүн бүрд тус төвийн үүд хаалга нээлт­тэй. Түүнчлэн эдгээр хүмүүс олон эмэгтэйд амьдралыг харах өнцөг, хандах хандлагыг өөрчилж, өөртөө итгэх итгэл, өөдрөг алхах даль жигүүр бэлэглэжээ.

A

Жижиг

A

Дунд

A

Том

5 хүртэлх насныханд COVID-19 хамгийн хүнд тусна

 0 сэтгэгдэл
  • Дархлаа нь бүрдэж гүйцээгүй нэг хүртэлх насныхан хамгийн их хүндэрч байв
  • Таваас доош насны хүүхдийн дархлаа сул, уушги бүрэн бэхжээгүй байдаг учир тэднийг эрсдэлтэй бүлэгт хамруулсан

Таваас доош насны хүүхдийн дархлаа сул, уушги бүрэн бэхжээгүй байдаг учир тэднийг эрсдэлтэй бүлэгт хамруулсан байна. Америкийн анагаах ухааны холбооны сэтгүүлд Хятадын 72000 халдвар тээгчийн мэдээллийн нэгтгэсэн судалгааны дүнг нийтэлжээ. ДЭМБ-ын төлөөлөгчид Хятадад ирээд коронавирусийн халдвар авагсдын 2.5 орчим хувь нь 18-аас доош насныхан байгааг мэдээлсэн. Гэхдээ уг тайланд “Хүүхдүүдийн дунд халдвар тархалтын түвшинг нарийн тооцоолох аргагүй. Түүнчлэн тэд вирус дамжуулахад ямар үүрэг гүйцэтгэдэг, шинж тэмдэг бага илэрдэг буюу өөр байдлаар илэрдэг зэргийг бүрэн судлаагүй байна” хэмээн онцолжээ. Pediatrics сэтгүүлд гарсан сүүлийн судалгааны тайланд бичсэнээр хүүхдүүдийн олонх нь COVID-19 өвчлөлийг хөнгөн давдаг ба халдвар авсан бага насныхны зургаа орчим хувьд нь хүндрэл гардаг аж. Өнөөгийн байдлаар шинэ коронавирус хүүхдэд хэрхэн нөлөөлдөг талаар дараах дүгнэлтийг хийжээ. COVID-19 өвчлөлийг үүсгэгч SARS-CoV-2 вирус нь хүүхэд ба томчуудыг өвчлүүлдэг. Хятадын Шэньжэн мужид вирус тархсан байдалд анализ хийгээд хүүхдийн халдвар авах магадлал томчуудынхтай адил гэж дүгнэв. Коронавирус тээгч хүүхдэд өвчлөлийн шинж тэмдэг насанд хүрэгчидтэй харьцуулахад бага илэрдэг аж. Гэхдээ хүүхдийн нас багасах тусам эрсдэл нэмэгддэг байна. Хятадын 2143 хүүхдэд хийсэн халдвар судлалын шинжилгээнээс үзэхэд тав хүртэлх насны хүүхдэд шинж тэмдэг хурц илэрч, амьсгалын хүндрэл үүсжээ. Ялангуяа, дархлаа нь бүрдэж гүйцээгүй нэг хүртэлх насныхан хамгийн их хүндэрч байв. Энэ байдал Уханьд батлагдсан юм. Зарим урьдчилсан судалгаанаас үзэхэд SARS-CoV-2 вирусийн шинж тэмдэг илрээгүй ч эхний хоёр долоо хоногтоо маш их халдвартай байдаг нь нотлогджээ. Энэ хугацаанд амьсгалын замын дээд хэсгийг бөглөрүүлж, ханиалгах, найтаах байдлаар халдана. Үүнээс гадна хүүхдийн өтгөн наалдсан сандлаар ч халдвар дамжих боломжтой гэнэ. 

A

Жижиг

A

Дунд

A

Том

Нью-Йоркт нохой, муурны хомсдол нүүрлэв

 0 сэтгэгдэл

Коронавирусийн цар тахлын улмаас хомсодсон зүйл гэхээр ариун цэврийн цаас, гар ариутгах шингэн, савласан ус санаанд ордог. Тэгвэл гайхаад барамгүй хачирхалтай нь нохой, бас муур үүнд багтаж байна. Вирусийн халдварын голомт болон Нью-Йорк хотын бүсэд гэнэт тэжээх амьтан олдохоо болив. Сүүлийн хоёр долоо хоногт тэжээх амьтан авах хүсэлтийн тоо 10 дахин өссөнтэй уялдан нохой, муурын “бэлэн нөөц” хэдийн дууссаныг амьтан асарч тэжээх ажил эрхэлдэг Muddy Paws Rescue, Best Friends Animal Society гэсэн хоёр байгууллага мэдэгдлээ. Орон гэртээ тусгаарлагдан байх уйтгартай бөгөөд айдастай тушаал авсан Нью-Йоркийн оршин суугчид дөрвөн хөлт андыг мэдрэл, нервээ тайвшруулах хэрэгсэл хэмээн үзэж байна. “Одоо манайд ганц ч нохой үлдээгүй” хэмээн Muddy Paws-ын маркетинг эрхэлсэн захирал Анна Лай өгүүлэв. Хувьцааны зах зээл нийтээрээ хямралтай ийм нөхцөлд тэжээвэр амьтны хоол тэжээл үйлдвэрлэгч Chewy Inc-ийн хувьцааны үнэ өссөөр буйн шалтгаан нь энэхүү хомсдолоос улбаатай болох нь. Үйлчлүүлэгчдийн цар хүрээ өргөжиж, онлайн захиалга нэмэгдсэн Chewy Inc-ийн хувьцааны үнэ он гарснаас хойш долоон хувиар өсөөд байна. Ачаалал ихэссэнтэй уялдан үйлчлүүлэгчдийнхээ захиалгыг 7-10 хоногт багтааж биелүүлнэ гэдгийг тус компани вэбсайтдаа анхааруулжээ. Гэртээ амьтан тэжээх хүсэл Нью-Йоркийн зэрэгцээ вирус тархсан бусад хотод ч ихэссэн юм. Тэжээгчтэй болсон дөрвөн хөлт амьтдын тоо Лос-Анжелесын салбарт нь мөн адил 70 хувиар нэмэгдсэнийг “Амьтдад харгис хандахаас сэргийлэх Америкийн нийгэмлэг” (American Society for the Prevention of Cruelty to Animals) тооцоолжээ. АНУ даяар амьтан асарч тэжээдэг олон байгууллагад нөхцөл байдал адил байгааг Best Friends тайлбарласан юм. Нохой, муурын эрэлт түр ихэссэн ч байдал удахгүй эсрэгээр эргэж, ажилгүй болсон америкчууд тэжээвэр амьтнаа авчирч өгөх нь ихсэж болзошгүй хэмээн АНУ-ын амьтан хамгаалах байгууллагууд түгшиж байна. “Эдийн засаг муудах үед юу болохыг таашгүй” хэмээн Колумбын тойрог, Нью-Жерси муж улсын тэжээвэр амьтан асарч хамгаалах төвүүдийг нэгтгэдэг Humane Rescue Alliance-ын гүйцэтгэх захирал Лайза ЛаФонтен тайлбарлав. 

A

Жижиг

A

Дунд

A

Том

Ганцхан өдрийн дотор $1 тэрбум олсон Жорж Сорос

 0 сэтгэгдэл

АНУ-ын тэрбумтан, 8.3 тэрбум ам.долларын хөрөнгөтэй, үнэт цаасны зах зээлийн томоохон тоглогч Жорс Соросын түүхийг танилцуулъя. Өдгөө 90 настай тэрбээр унгар гаралтай бөгөөд 1946 онд Англи руу дүрвэж, Лондоны эдийн засгийн сургуулийг төгссөн. Улмаар 1956 онд АНУ-д цагаачлан санхүүгийн ертөнцөд хөл тавьж байлаа. Жорж мөнгөний ханш хаана унаж, хаана өсөхийг урьдчилан таамаглаж, орон орны банкны хувьцааг арилжсаар арван жилийн дотор мөнгөө 4000 хувиар өсгөж чадсан юм. Тэрбээр 1992 оны есдүгээр сарын 16-ны өдөр Их Британийн фунт стерлингийн ханшийг унагаах ажиллагаа зохион байгуулж, 12 хувьд хүргээд тэрхүү уналтаас ганцхан өдрийн дотор нэг тэрбум ам.долларын ашиг олж байв. Түүнийг эл явдлаас нь улбаалан “Английн банкийг дампууруулагч” хэмээн хочилдог болсон. Харин ханшийн уналтын тэрхүү өдрийг “Хар лхагва гариг” хэмээдэг. Жорж Сорос хүмүүнлэгийн үйл ажиллагаанд мөнгө зардгаараа алдартай бөгөөд өөрийн сангаар дамжуулан 2018 оны байдлаар нийт 18 тэрбум ам.долларыг хүмүүнлэгийн үйл ажиллагаанд хандивласан байна. 

A

Жижиг

A

Дунд

A

Том

Улс орнууд цар тахлын эсрэг арга хэмжээ авахдаа хугацаа алдаж байна

 0 сэтгэгдэл
  • Дэлхий ертөнц цар тахлын нөхцөлд ажиллах бэлтгэлгүй байгааг ДЭМБ анхааруулав 
  • Тусгаарлалт хэр урт үргэлжлэх нь тухайн улс орон өвчний тархалтын эсрэг ямар арга хэмжээ авч буйгаас шалтгаална

COVID-19 цар тахлаас урьдчилан сэргийлэх боломжоо алдсан засгийн газрууд коронавирустэй тэмцэх үнэт цаг хугацааг дэмий алдсаар байгааг зогсоох ёстой хэмээн Дэлхийн Эрүүл Мэндийн Байгууллагын (ДЭМБ) тэргүүн анхааруулав. “Бид эхний боломжийг алдсан. Идэвхтэй ажиллах ёстой үе нь нэг, хоёр сарын өмнө байж” хэмээн ДЭМБ-ын Ерөнхий захирал Тедрос Аданом Гебресус мэдэгдлээ. Уг мэдэгдэл нь өдгөө дэлхийн бараг бүх улсад илэрч 20,000 орчим хүний амийг аваад буй аюулт өвчний эсрэг дэлхийн тэмцэл ахиц муутай буйг ойлгуулах гэсэн сануулга болов. Тус байгууллага гишүүн улсуудаа ил тод шүүмжлэхээс аль болох зайлсхийж ирснийг онцгой байдлын хөтөлбөр хариуцсан захирал Майк Райан тайлбарласан юм. Одоогийн байдлаар дэлхийн 150 улсад вирусийн халдварын тохиолдол 100-гаас цөөн бүртгэгдсэн учраас бэлтгэх, бэлэн байх хугацаа болон хоёр дахь боломж бас ч байгааг ДЭМБ-ын тэргүүн онцлон дурдав. Тусгаарлах арга хэмжээ авсан улс орнууд вирусийн тархалтыг шийдмэг таслан зогсоох арга хэмжээ авч, цаг хожлоо. Тусгаарлалт хэр урт үргэлжлэх нь тухайн улс орон өвчний тархалтын эсрэг ямар арга хэмжээ авч буйгаас шалтгаална хэмээн Тедрос үзэж буй. Хатуу тусгаарлалт нийгэм болон эдийн засгийн сөрөг нөлөөтэй. Гэхдээ "өвчний тохиолдол ихэссэний улмаас сургууль, албан байгууллагуудыг дахиад хаахад хүргэлгүйгээр нээх нь аль ч улсад чухал” гэдгийг Тедрос онцлон анхааруулав. ДЭМБ-ын тэргүүн бүх улс авах ёстой доорх зургаан арга хэмжээг мөн дурдсан юм. 

• Эрүүлийг хамгаалахын ажилтнуудын тоог ихэсгэж дадлагажуулан, хуваарилж ажиллуулах 

• Сэжигтэй тохиолдлыг илрүүлэх тогтолцоо нэвтрүүлэх 

• Оношлуурын үйлдвэрлэлийг эрс ихэсгэж, хүртээмжийг сайжруулах 

• Коронавирусийн эмчилгээний төв болгон хувиргах боломжтой объектуудаа тодорхойлох 

• Карантин-хөл хорионы дэглэмийн төлөвлөгөө боловсруулах 

• Засгийн газар үйл ажиллагаагаа вирусийг дарахад чиглүүлэх гэв. 

Түүнчлэн “Дэлхий цар тахалд бэлтгэлгүй байна” хэмээн захирал Райан тайлбарлав. Жишээ нь, ханган нийлүүлэх сүлжээ тасалдсанаар эмнэлгийн бээлий хомсдож болзошгүй. Учир нь эмнэлгийн бээлийн түүхий эд-каучукийг дэлхийн хэдхэн улс нийлүүлдэг. Дэлхий даяар эрүүлийг хамгаалахын ажилтан, ажилчдад хувийн хамгаалалтын хэрэгсэл дутагдаж байгааг ДЭМБ-ын тахал судлаач Мария Ван Керков тайлбарласан юм. Өвдөөгүй хүнд маск хэрэггүй, харин тухайн улсын хэрэглээнээс болоод эмч нарт маск хүрэлцэхгүй байж болохгүйг Ван Керков анхаарууллаа.