A

Жижиг

A

Дунд

A

Том
http://zgm.mn/post/1141/

Бээжин Уолл Стритэд түшиглэн Трампыг зогсооно

 0 сэтгэгдэл

A

Жижиг

A

Дунд

A

Том
http://zgm.mn/post/1141/


АНУ-д нийлүүлэх Хятадын бүх бараа бүтээгдэхүүнд Ерөнхийлөгч Дональд Трамп өндөр татвар ногдуулахаар сүрдүүлсэнтэй холбогдуулан БНХАУ-ын Засгийн газар уолл Стритийн гол банкуудын удирдагч нарыг Бээжинд яаруу урьж уулзалт зохион байгуулах гэж байна. Хятадын Коммунист Намын (ХКН) удирдлага Америкийн санхүүгийн тэргүүлэх институцуудын захирлуудыг Бээжин хотноо есдүгээр сарын 16-нд хуралдах “Хятад-Америкийн Санхүүгийн дугуй ширээ”-ний уулзалтад оролцохыг урьсан тухай гурван ч эх сурвалж мэдээлэв. Ярилцлагын дараа оролцогчид БНХАУ-ын дэд дарга Ван Чишаньтай уулзана. Урьд нь Хятадын төв банкны тэргүүн байсан Жоу Сяочуань, Goldman Sachs-ын гүйцэтгэх захирал байгаад эдүгээ уул уурхайн Barrick Gold-ыг тэргүүлж буй Жон Торнтон нар шинэ группийг удирдана. Уг групп Хятад-Америкийн харилцааны асуудлаар хагас жил тутам хуралдаж БНХАУ-ын Pасгийнгазарт санхүү, эдийн засгийн шинэчлэлийн зөвлөгөө өгч байх юм. “Хоёр улсын санхүүгийн үйлдвэрлэлийг төлөөлж буй бид Хятад-Америкийн харилцааг сайжруулах үүрэгтэй улс” хэмээн дугуй ширээнд оролцогч нэгэн тайлбарлав. “Бидний харилцаа цөөн хэдэн хүн сүйтгэчихэж болохооргүй дэндүү чухал” хэмээн тэрбээр өгүүлж байна.

Ирэх долоо хоногт болох уулзалтад Blackstone-ын тэргүүн Стивен Шварцман, Citigroup, Goldman, JPMorgan, Morgan Stanley-ийн захирлууд, Сангийн сайд асан хэнк Паулсон нарыг нэр заан уриад байна. Урилгыг БНХАУ-ын орлогч ерөнхий сайд Лю хөгийн зөвлөх байсан, Хятадын үнэт цаасны зохицуулах байгууллагын дэд дарга Фан Шинхайгийн нэрийн өмнөөс гаргажээ. Фан Шинхай нь АНУ-тай худалдааны дайн өрнүүлэхээс зайлсхийх Бээжингийн урьд өмнөх хүчин чармайлтад гол үүрэг гүйцэтгэсэн эрхэм юм. Хятадын талын бүрэлдэхүүнд Хятадын ардын Банкны тэргүүний суудалд ноён Жоугийн халааг авсан И Ган, банк, даатгалын байгууллагын зохицуулагч Гуо Шучин, ноён Дюгийн ойрын зөвлөх, сангийн дэд сайд Ляо Мин нар багтжээ. БНХАУ-ын Засгийн газрын тулгуу арга хэмжээнээс шалтгаалан урилга авсан АНУ-ын санхүүгийн институцуудын зарим удирдлага уулзалтад оролцож амжихгүй аж. Тухайлбал, уулзалтад Blackstone-ыг тус группийн ерөнхийлөгч Жон Грэй төлөөлж оролцоно. Goldman Sachs-ыг тус группийн хөрөнгө оруулалтын банкны ажиллагаа хариуцсан захирлын нэг Жон Уолдрон төлөөлөх юм. Ноён Паулсон мөн уг уулзалтад оролцож амжихгүй. Ноён Трамп шударга бус худалдаа, хөрөнгө оруулалтын хэрэгт буруутган хятадын 50 тэрбум ам.долларын экспортод шийтгэгч шинжтэй тариф тогтоож, нэмж 200 тэрбум ам.долларын бүтээгдэхүүнд нэмж татвар ногдуулахаар сүрдүүлсэн.

Ерөнхийлөгч АНУ-д нийлүүлдэг хятадын үлдэж буй бусад бараа бүтээгдэхүүнд ч мөн татвар тогтооно гэдгээ баасан гарагт мэдэгдсэн билээ. Мөн Apple компани ч бүтээгдэхүүнээ Хятадад бус АНУ-д үйлдвэрлэх ёстой хэмээн тэрбээр бямба гарагт Twitter-тээ бичсэн юм. Ноён Трампын татварын дараагийн шат биелбэл хариу болгон АНУ-ын 60 тэрбум ам.долларын экспортод татвар оноохоо Хятад улс мэдэгдлээ. БНХАУ нь 2017 онд АНУ-аас 130 тэрбум ам.долларын бараа бүтээгдэхүүн импортолж, 500 тэрбум ам.долларын бүтээгдэхүүнийг АНУ-д экспортоор гаргажээ. Ноён Паулсон, Ван нар 2006 онд суурийг нь тавьсан “стратеги, эдийн засгийн цуврал яриа хэлэлцээ”-г хэвээр үргэлжлүүлэх замаар Вашингтонтой харилцаагаа хадгалж үлдэхээр Бээжин ийнхүү эрмэлзэж байна. Хагас жил тутамд болдог цуврал яриа хэлэлцээг ноён Трамп зогсоосон юм. Хятад улс сүүлийн хэдэн сараас санхүүгийн салбараа нээлттэй болгож эхэлсэн нь ач тусаа өгнө хэмээн Уолл Стритийн зарим групп найдаж байна. Үнэт цаасны арилжаа, сангийн менежментийн компаниуд дахь гадаадын эзэмшлийн хувь хэмжээг Бээжин энэ оны дөрөвдүгээр сард 49-өөс 51 хувь болгон өсгөсөн. Шийдвэр гарсны дараахан АНУ-ын хэд хэдэн том банк Хятад дахь үйл ажиллагаандаа гол хувьцаа эзэмшигчийн эрхтэй болох зорилго тавьж буйгаа мэдэгдэж байв.

A

Жижиг

A

Дунд

A

Том

Ирланд Apple-аас татвараа нөхөн авахгүйн төлөө тэмцэнэ

 0 сэтгэгдэл

A

Жижиг

A

Дунд

A

Том

Мөнгө угаахын эсрэг тэмцэлд алдаа гаргасан Credit Suisse-ийг шалгалаа

 0 сэтгэгдэл


Мөнгө угаах гэмт хэргийн эсрэг тэмцэлд алдаа гаргасан Credit Suisse-ийг Швейцарын санхүүгийн хянах байгууллага шалгалаа. Уг шалгалт сэжиг бүхий хууль бус санхүүжилтэд нэр холбогдоод буй Европын банкинд шинэ цохилт болов. Дэлхийн хөлбөмбөгийн спортын зохицуулах байгууллага FIFA, Бразилын газрын тосны Petrobras, Венесуэлийн газрын тосны PDVSA компани зэрэг байгууллагатай холбоо бүхий авлигын хэд хэдэн дуулиант хэрэгт банк хөнгөн хандсаныг санхүүгийн хяналтын FINMA байгууллага тогтоов. FINMA-гийн дүгнэлт нь Европын банкуудтай холбоотой шил дарсан хэргүүдийн сүүлийн жишээ. Уг хэргээс өмнөхөн данийн зээлдүүлэгч Danske Bankны Эстони дахь салбараар дамжуулан ганцхан жилийн дотор ОХУ, хуучин ЗХУ-ын 30 тэрбум ам.доллар дамжсан нь илэрсэн юм. Нидерландын банк, санхүүгийн ING группийн санхүү хариуцсан захирал өнгөрсөн долоо хоногт огцорсон. Мөнгө угаах гэмт хэрэгт тавих хяналт сул байсныхаа төлөө Нидерландын банк 775 сая ам.доллараар торгуулсны дараа захирал албан тушаалаа орхижээ. Хөндлөнгийн байгууллагын хяналт үүсгэх замаар банк санхүүгийн тогтолцоогоо засаж сайжруулах шаардлагыг даваа гарагт FINMA-гаас Credit Suisse-д тавилаа.

Швейцарын хуулиар FINMA торгууль оноох эрхгүй. FINMA-гийн шүүмж нь 2015 оноос Credit Suisse-ийн гүйцэтгэх захирлаар ажиллаж буй Тижейн Тиамд цохилт болов. Ноён Тиам бүтцийн дайчин шинэчлэл өрнүүлэх замаар тус банкны үйл ажиллагааг дэлхийн баячуудын хөрөнгийг эрхлэн хөтлөхөд чиглүүлэх зорилт тавьсан юм. Банкны ажиллагааны алдаа дутагдал нь “хуучин уламжлал” хэмээн анхааруулж буй FINMA-гийн дүгнэлтийг Credit Suisse хүлээн зөвшөөрчээ. Банк урьд өмнөх хэрэгт дүгнэлт гаргаж “алдаа дутагдлыг засаж залруулах идэвхтэй арга хэмжээ авахын тулд FINMA-тай хамтран ажиллаж байгаа”-гаа мэдэгдэв. FIFA-тай холбоотой хэрэг 2015 оны тавдугаар сард тус байгууллагын дээд удирдлагад ажилладаг хүмүүсийг Цюрихын тансаг зэрэглэлийн зочид буудлаас сүр дуулиантай баривчилснаар эхэлжээ. Баривчлагдагсдыг АНУ, Швейцарын хууль сахиулах байгууллагууд гэмт хэрэг, хээл хахууль, авлигын хэргээр мөрдөн шалгасан нь FIFA-гийн ирээдүйд занал учруулсан юм. FINMA 2015 оноос хойш FIFA, Petrobras, PDVSA оролцсон авлигын хэрэгт “хэд хэдэн банк”-ийг сэжиглэн шалгаж эхэлснээ тайлбарлав. Credit Suisse 2006-2016 онд үйлчлүүлэгчээ таних, ашиг хүртэгч эздийг тодруулах, эрсдэлтэй бизнесийн харилцаа, бичиг баримтыг ангилах ажилд хайнга ажиллаж ирснийг FINMA илрүүлжээ.

“Олж илрүүлсэн алдаа дутагдал олон жилийн турш, үндсэндээ 2014 оноос өмнө оршиж байсан”-ыг FINMA тайлбарлав. Мөнгө угаах гэмт хэргээс үр дүнтэй сэргийлэх гэвэл банкны бүх салбар “үйлчлүүлэгчийнхээ банктай тогтоосон аливаа харилцааг тэр дор нь автоматаар тодорхойлох чадвартай байх ёстой” хэмээн Швейцарын санхүүгийн хянах байгууллага үзэж байна. Үүний зэрэгцээ тус банк урьд нь гэмт хэрэгт буруутсан этгээдийг “харилцааны менежер” болгосон, “улс төрийн нэр нөлөө бүхий хүмүүс”-тэй тогтоосон бизнесийн харилцаанд хяналт тавьж, эрсдэлийг нь үнэлэхдээ алдсаныг FINMA тусад нь анхааруулав. FINMA-гийн дүгнэлтэд тодорхой нэр дурдаагүй. Гэхдээ уг хэрэгт ойр эх сурвалж дээрх дүгнэлт нь Credit Suisse-ийнүйлчлүүлэгчийн зөвлөх байсан Патрис Лескодроныг хэлж буй хэрэг хэмээн тайлбарлав. Лескодрон нь Гүржийн ерөнхий сайд асан Бижина Иванишвили зэрэг үйлчлүүлэгчдийн итгэлийг буруугаар ашигласан хэргээр хоёрдугаар сард Женевийн шүүхэд татагдсан юм. “Активын менежмент тун амжилттай эрхэлсэн” харилцааны менежер банкны журмыг олон жил зөрчсөнийг FINMA-гийн тайлбарт дурджээ. “Гэтэл банк сахилга зөрчиж буй менежерт хариуцлага тооцож, анхааруулахын оронд харин ч цалинг нь өсгөн, сайн ажилтан хэмээн үнэлсэн”-ийг швейцарын зохицуулах байгууллага тайлбарласан юм.

A

Жижиг

A

Дунд

A

Том

Хятадын $200 тэрбумын импортод тариф тогтоов

 0 сэтгэгдэл

A

Жижиг

A

Дунд

A

Том

Япончууд пластикийг шахахаар зорьж байна

 0 сэтгэгдэл

Японы цаас үйлдвэрлэгч компаниуд маркетинг ба судалгааны нэгжүүддээ дэлхий даяар хуванцарын эсрэг хөдөлгөөн өрнүүлж, цаасны ирээдүй бол хоосон үг биш гэдгийг ойлгуулах даалгавар өгчээ. Тусгайлан байгуулсан хэлтсүүд сав баглаа боодлын аль ч төрлийг цаасан бүтээгдэхүүнээр орлуулах технологи боловсруулах зорилт тавив. Түүнчлэн Засгийн газар болон компаниуд пластик уут, аяга, соруул гэх мэт нэг удаагийн бүтээгдэхүүнээс татгалзахыг эрмэлзэж буй үед цаасан бүтээгдэхүүний борлуулалтыг өсгөхийн тулд төвлөрсөн арга хэмжээ зохион байгуулна. Саяхан Starbucks кофены сүлжээ 2020 он гэхэд пластик соруулаас бүрэн татгалзахаа зарласан бол Disney, McDonald’s зэрэг компани энэ чиглэлд хөтөлбөр хэрэгжүүлэхээр төлөвлөөд буй. Үүний дараахан Японы цаас үйлдвэрлэгчид ийм арга хэмжээ авч байгаа нь цаг үеэ олсон хэрэг юм.

Гэтэл Японы зоогийн газрууд, жижиглэн худалдаачид пластикаас татгалзах тухай олигтой ярихгүй байгаа нь Токио 2020 оны олимпын тоглолтод бэлтгэж байгаа үед хачирхалтай явдал гэж цаасны нэгэн компанийн захирал хэллээ. Японы Засгийн газар удахгүй уг салбарын судалгаа, хөгжүүлэлтэд татаас олгох санаачилга гаргаж, цаасны үйлдвэрлэлийн хүчин чадлыг дэмжих байх гэж салбарын нэг шинжээч үзэж байна. Дэлхийд цаасны борлуулалтаар топ тавд багтдаг Oji Holdings шинээр байгуулсан “инновацыг дэмжих төв”-дөө захирлуудыг томилон ажиллуулж эхэлсэн юм. Тус компанийн дотоод өрсөлдөгч Nippon Paper Industries өнгөрсөн сард мөн “Цаасжуулалтыг дэмжих оффис” байгуулжээ. Уг хэлтэс олон жил үргэлжилсэн цаасгүй оффис хэмээх үгийн оронд “Цаасаар юу хийж чадахаа харуулах боломж олгоё” гэсэн уриа дэвшүүлэв.

Судалгаа, маркетингийн нэгжүүд кофе ба түргэн хоолны сүлжээнүүдэд цаасан соруул, цаасан таг зэргийг ашиглахыг санал болгохоос гадна хэрэглээний бүтээгдэхүүн үйлчдвэрлэгчдэд хандаж, шампунь, шингэн саван гэх мэт шингэнийг сүүний савтай адил хатуу цаасанд савлахыг ятгахаар ажиллана. Nippon Paper-ын анхаарал татсан нэг шинэ технологи бол хүнсний үнэрийг хадгалдаг цаасан уут бөгөөд төмсний чипс зэрэг хүнсийг савлах боломжтой. Тус компани бизнесийн боломж өргөжиж байгааг мэдэгдсэн Гэвч Nippon Paper-ын захирлууд цаасжуулах хөдөлгөөний хамгийн том саад тотгор нь үнэ өртгийн асуудал байгааг хүлээн зөвшөөрчээ. Тухайлбал, цаасан соруул пластик соруулаас зургаа дахин илүү үнэтэй бөгөөд түүхий эдийн үнээс голлон шалтгаалдаг аж. Түүнчлэн цаасан сав хийхэд пластикаас илүү хүндрэлтэй байдаг. Пластикийг халаагаад наадаг бол цаасыг заавал цавуудаж наах хэрэгтэй. Nomura банкны цаасны салбарын шинжээч Такаоми Коно “өнөөгийн байдлаар цаас илүү үнэтэй, үйлдвэрлэхэд бэрхшээлтэй байгаа нь зах зээлд борлуулалт өсгөхөд гол саад болж буй ч үйлдвэрлэгчид технологио сайжруулж, Засгийн газар татаас олгох байх гэж бодож байна” хэмээн дүгнэлээ.