A

Жижиг

A

Дунд

A

Том
http://zgm.mn/post/617/

Их өөрчлөлтийн салхи сэвэлзлээ

 0 сэтгэгдэл

A

Жижиг

A

Дунд

A

Том
http://zgm.mn/post/617/

Магадгүй энэ зууны хамгийн түүхт уулзалт өчигдөр Сентоса аралд болж өндөрлөлөө. Энэ уулзалтын үйл ажиллагааг дэлхий даяар анирдан асар анхааралтай ажиглалаа. Өрнөдийн судлаач, тоймчдын үзэж байгаагаар үр дүн гарах процесс 15-20 жил үргэлжлэх бололтой. Магадгүй бүр эсрэгээр эргэхийг ч үгүйсгэхгүй. Юутай ч олон арван жил үргэлжилсэн үл ойлголцолд гэрэл гэгээ туслаа. Д.Трамп, Ким Жон Ун нарын түүхэн уулзалт бүс нутагт төдийгүй дэлхий дахинд их өөрчлөлтийн салхийг сэвэлзүүллээ. Азийн Женев гэгдэж буй Сингапурт АНУ, Хойд Солонгосын дээд хэмжээний уулзалт эхлэхэд Ким Жон Ун “Дэлхий даяар олон хүн үүнийг шинжлэх ухаан, адал явдлын кинонд гардаг шиг зөгнөлт явдал гэж бодож байсан байх” гэсэн юм. Харин хоёр удирдагч албан ёсны хэлэлцээг дуусгах үед Дональд Трамп Солонгосын хойгт цөмийн зэвсгийг устгах үйл явцын эхлэлийг тавина гэдэгт найдаж буйгаа дурдаад “Уулзалт санаснаас илүү байлаа” хэмээн дүгнэв. Тэд уулзалтын талаар нааштай үг хэлж, хамтарсан баримт бичигт гарын үсэг зурлаа. Гарын үсэг зурах ёслолын дараа ноён Ким “Бидний үзэглэж буй баримт өргөн асуудлыг хамарсан, хоёр тал үр дүнд сэтгэл хангалуун байгаа... Бид дэлхийн маш том атлаа аюултай асуудлыг шийдвэрлэх гэж байна” гэжээ. Ноён Трамп “Хоёр улс өнгөрснийг ардаа орхилоо. Дэлхий дахин үндсэн өөрчлөлтийг харах болно” хэмээн мэдэгдсэн байна. Баримт бичгийн агуулгыг нийтэд одоохондоо мэдээлээгүй байна. Уулзалтын дараах хэвлэлийн бага хурал дээр ноён Трампаас Хойд Солонгос цөмийн зэвсгээ устгахыг зөвшөөрсөн эсэхийг асуухад “Бид уг үйл явцыг нэн даруй эхлүүлнэ” хэмээн хариуллаа. Тэрбээр “АНУ, Өмнөд Солонгос дахь цэргийн сургуулилалтаа зогсооно. Гэхдээ Пхеньяны эсрэг эдийн засгийн хориг хэвээр байгаа. Цөмийн зэвсгийг бүрэн хураахад цаг хугацаа хэрэгтэй. Солонгосын дайныг удахгүй зогсооно” гэж онцлон мэдэгдлээ. АНУ-ын Ерөнхийлөгч мөн Солонгосын хойгт урт хугацааны бат бэх энх тайван тогтооход болон их удирдагч Ким Жон Унд аюулгүй байдлын баталгаа өгөх үүрэг хүлээснээ мэдэгдсэн байна.




A

Жижиг

A

Дунд

A

Том

Европын холбоо “иргэншлийн худалдаа”-г зогсоохоор бэлтгэж эхэллээ

 0 сэтгэгдэл


Европын холбооноос гадуурх бүсийн баячуудад иргэншил олгодог Мальт, Кипр зэрэг гишүүн улсын Засгийн газрын эсрэг хатуу арга хэмжээ авахаар Брюссель бэлтгэж байна. Уг арга хэмжээ ОХУ-аас гаралтай “бохир мөнгө”-ний урсгалыг зогсоох зорилготой. Авлига, мөнгө угаахын эсрэг тэмцлийн хүрээнд Брюссель Европын холбооны гишүүн найман улсын “иргэншлийн худалдаа”-ны тогтолцоог шалгах гэж буйг тус холбооны хууль зүйн комиссар Вера Журова мэдэгдлээ. Мөн Мальтын иргэншил хүсэгч Оросуудын хөрөнгийн үүсэл гарал сэжиг төрүүлж байгааг комиссар нэмж анхааруулав. “Аливаа сэжигтэй тохиолдолд иргэншил авах давуу эрх эдлэх ёсгүй. Бидэнд иймэрхүү практикийг хориглох эрх байхгүй ч гишүүн улсуудад илүү хатуу шаардлага тавих үүрэг бий. Учир нь гишүүн улс бүр Европын иргэншил олгодог”-ийг хатагтай Журова Financial Times-д тайлбарлав.

Европын холбоо “хөрөнгө оруулалтаар иргэншил олгогч” тогтолцоотой улсад Мальт, Киприйн зэрэгцээ Австри, Грек, Унгар, Латви, Литва, Португалыг оруулжээ. Ийм тогтолцоотой улс иргэншил хүсэгчдэд үл хөдлөх хөрөнгө болон үнэт цаасанд ихээхэн хөрөнгө оруулсан байх шаардлага тавьдаг. Хариуд нь шинэ паспорт эзэмшигч Европын холбооны аль ч улсад ажиллаж, амьдрах, шенгений бүсэд чөлөөтэй аялах эрх эдэлдэг. Европын холбооны гишүүн улс бүр иргэншил олгох шалгуураа өөрсдийн үзэмжээр тогтоодог. Иргэншил хүсэгчид, тэдний хөрөнгийн үүсвэрийг шалгах тогтолцоо хангалтгүй хэмээн үзсэн тусгай тайланг Европын комисс энэ намар нийтлэхээр бэлтгэж байна. Уг тайлан мөнгөний хууль бус урсгалд тавих хяналтыг чангатгахаар Европын төв банк, Европын банкны хяналтын албатай хамтран хэрэгжүүлж буй мөнгө угаахын эсрэг тэмцлийн хүрээнд гарах юм.

Европын холбооны улсуудад ОХУ-ын сангууд нэвтэрч буйг хянах хяналт сул буйгаас Мальт, Латвийн банкинд мөнгө угаасан дуулиант хэд хэдэн хэрэг гарсан нь иргэншил олгох тогтолцоог чангатгах шаардлагатайг харууллаа. Улсын хөгжлийн санд 650 мянган евро оруулсан, үл хөдлөх хөрөнгө түрээсэлсэн юм уу худалдаж авсан, 150 мянган еврогоос багагүй хэмжээгээр хувьцаа, бонд худалдаж авсан хувь хүнд иргэншил олгодог Мальтын тогтолцоо онцгой түгшүүр төрүүлж байгааг хатагтай Журова мэдэгдлээ. Үүний зэрэгцээ иргэншил хүсэгчийн гэр бүлийн гишүүд тус бүр 25-50 мянган евро нэмж төлөөд паспорт авч болно. “Насан туршдаа дунд, дээд түвшний алба хашсан, цалин төдий л их бус орос иргэд гэнэт мальтын иргэншил худалдаж авах мөнгөтэй болчихдог нь сэжигтэй” хэмээн комиссар тайлбарлав.

A

Жижиг

A

Дунд

A

Том

Samsung шинэ бүтээгдэхүүн, шинэ түншлэлээр орлогоо өсгөнө

 0 сэтгэгдэл


Samsung пүрэв гарагт Note 9 ухаалаг утас, бугуйн шинэ ухаалаг цаг, шинэ спикерээ танилцуулж, хөгжмийн үйлчилгээний Spotify, компьютер тоглоом бүтээгч Fortnite-тай хамтран ажиллахаар боллоо. Шинэ Galaxy S9 загварын борлуулалт тааруухан байснаас шалтгаалан мобайл зах зээлд Samsung-ийн эзэлдэг хувь хэмжээг Apple, Huawei зэрэг өрсөлдөгч нь багасгаж дөнгөлөө. Энэ оны хоёрдугаар улирлын борлуулалтын дүнгээр, ухаалаг утасны зах зээлд Samsung-ийн эзэлдэг хувь хэмжээ 10 хувиар багассаныг IDC-гийн судлаачид өнгөрсөн сард тайлбарласан юм. Мөн хугацаанд Хятадын Huawei компанийн борлуулалт 41 хувиар өсөж Apple-ийг гүйцэж түрүүлэн, Samsung-ийн дараа хоёрдугаарт орлоо. Apple компани iPhone X утасныхаа илүү том, шинэ хувилбарыг танилцуулахаас сарын өмнө, пүрэв гарагт Samsung Нью-Йорк хотноо Unpacked арга хэмжээ зохион байгуулав. Note 9 утас нь 6.4 инчийн дэлгэц, илүү урт хугацаанд ажилладаг зай, видео бичлэг авах, презентац сонирхуулах, гэрэл зураг авах үед алсын удирдлага болгон хэрэглэх боломжтой сайжруулсан S Pen стилустэй.

Дээд түвшний хэрэглэгчдэд зориулагдсан уг загвар 1000 ам.долларын үнэтэй нь ухаалаг утсаа солих давтамж саарч буй нөхцөлд өндөр үнэ тогтоох замаар орлогоо ихэсгэх оролдлого болж байна. Unpacked-ын үеэр Samsung компани Amazon-ы Echo, Google-ийн Home, Apple-ийн HomePod-тэй өрсөлдүүлэн Galaxy Home хэмээх ухаалаг спикерийн урьдчилсан загвар сонирхууллаа. Мөн “өмсдөг” технологийн зах зээлд дахин байр сууриа эзлэхээр төлөвлөж буйгаа харуулан Galaxy Watch бугуйн ухаалаг цаг тавьсан байлаа. Дээрх дивайсуудыг Samsung-ийн виртуал дуут туслагч Bixby-гийн сайжруулсан хувилбар дэмжинэ. Bixby ажиллагааны хувьд Apple-ийн Siri, Amazon-ы Alexa, Google-ийн Assistant-ыг гүйцэхгүй. Гэхдээ “Өөрийн тань хэрэгцээ шаардлагад нийцсэн шинэ чадавхтай болж чадсан” гэж Samsung-ын мобайл салбарын тэргүүн Д.Ж.Ко тайлбарлав.

Өмнөд Солонгосын үйлдвэрлэгч дуу хөгжмийн стриминг үйлчилгээний салбарт хувьцааных нь үнэ бараг таван хувь өсөөд буй Spotify-тай “урт хугацааны түншлэл” тогтоосноо зарлав. Түншлэлийн хүрээнд ухаалаг утас, Bixby, телевиз, интернет холболттой хөргөгч зэрэг Samsung-ийн олон бүтээгдэхүүнд Spotify үйлчилгээг нэгтгэж өгнө. Мөн Samsung эдүгээ хүртэл зөвхөн персональ компьютер, гэйм консол, iPhone-д ажиллаж ирсэн нийтэд түгээмэл Battle Royale тоглоомын андройд хувилбарыг хэрэглэгчдэд нийлүүлэхийн тулд уг тоглоомыг бүтээгч Fortnite компанитай хамтран ажиллахаар болжээ. Battle Royale-ыг дэлхий даяар 125 сая гаруй хүн тоглож байгааг тоглоом хөгжүүлэгч Epic Games-ийн гүйцэтгэх захирал Тим Суини тайлбарлав. Note 9 наймдугаар сарын 24-нөөс худалдаанд гарна. Galaxy Watch ч мөн өдөр 330 ам.долларын үнээр зарагдаж эхэлнэ. Харин Galaxy Home-ийн худалдаанд гарах тов, үнэ хараахан тодроогүй байна.

A

Жижиг

A

Дунд

A

Том

Санхүүгээр төгсөгчид Британид ажиллах нь цөөрчээ

 0 сэтгэгдэл


Их Британи санхүүгийн мэргэжлээр мастерын зэрэг хамгаалахад хамгийн тохиромжтой улс. Гэвч төгссөний дараа үлдэж ажиллах боломж хумигдаж байна. Financial Times-ийн энэ онд явуулсан судалгаанаас үзэхэд 2012 оноос хойш Британид мастер хийгээд энд гурван жил дадлагажиж ажилласан Европын бус төгсөгчдийн тоо хоёр дахин буурчээ. Түүнчлэн мөн хугацаанд курсээс хасагдсан оюутны тоо 25 хувиас 10 болж буурсан байна. Европын эдийн засгийн бүсээс гаднах улсуудаас ирдэг оюутнууд үлдэж ажиллах сонирхлыг цалингаар тайлбарлаж болно. Энд ажиллахад жилдээ 66000 ам.долларын цалин авдаг бол эх орондоо очиход 53000 ам.долларын орлого хүлээдэг. Гэтэл эдүгээ Британид визний шалгуурын улмаас ажил олох бараг боломжгүй болсныг Варвикийн бизнесийн сургуулийн нэг төгсөгч ярилаа.


Түүний хэлснээр “Гадаадын оюутан энд сураад ажил хайх боломж байхгүй. Бүгдээрээ сонголт хийх шаардлагатай болдог” аж. 2012 онд Британийн Засгийн газар төгсөлтийн дараах визийг цуцалсан. Харин гадаадын санхүүгийн оюутнууд ирэх дуртай хоёр дахь улс болох АНУ-д төгсөгчид үлдэж ажиллах эрхтэй бөгөөд дээрх хугацаанд уг үзүүлэлт 48 хувиас 64-т хүрчээ. Санхүүгийн зэрэг олгодог сургуулиудад Азийн элсэгчид чухал ач холбогдолтой. Тэд санхүүгийн мастерын сургалтад элсэгчдийн гуравны хоёрыг бүрдүүлдэг. Түүнчлэн батламжтай 65 дадлагажих хөтөлбөрт хамрагдагсдын Британид 78, АНУ-д 73 хувийг эзэлдэг байна.

Глазго дахь Адам Смитийн бизнесийн сургуулийн мастерын хөтөлбөрийн хүрээнд олон улсынсанхүүгийн курст суралцагч 173 оюутны 95 хувь нь Хятадаас ирсэн байв. Түүнчлэн Европын орнуудаас Британид ирж санхүүгээр суралцаад ажиллахаар үлдсэн хүний тоо сүүлийн хоёр жилд мөн цөөрч, 2016 онд 42 хувь байснаа одоо 37 хувь болжээ. Харин Францын нийслэл Парис хот санхүүгийн хөтөлбөрийн зэрэглэлд буцаад дээгүүр байр эзлэх боллоо. Энд төгсөгчид төгссөнөөс гурван жилийн дараа 136000 ам.долларын цалинд хүрч байгаа нь төгсөөд анх авсан цалингаас 82 хувь дээгүүр байгаа юм. Шинжээчид энэ байдлыг Их Британи Европын холбооноос гарч байгаа үед Парис хот Лондоны оронд Европын санхүүгийн төв болохыг эрмэлзэж буйтай холбон тайлбарлаж байна.

A

Жижиг

A

Дунд

A

Том

Хятад, Оросын аюултай нөхөрлөл

 0 сэтгэгдэл

Өрнөдийн тагнуулын албадын алдааны жагсаалтад хүйтэн дайны үеийн Хятад, Зөвлөлтийн хөлдүү хагарлыг ажиглалгүй өнгөрсөн нь тодхон үлджээ. Тагнуулын төв газрын тэрс үзэлт цөөн ажилтан 1950-иад оны сүүлээс эхлэн баримт нотолгоог харуулсаар атал Вашингтон дахь удаа дараагийн засаг захиргаа коммунист эвслийн хоёр том гишүүн бие биеэ үзэн ядаж байгаа гэдэг үл итгэж байв. 1969 онд Сибирь, Манжуурын хил дээр байлдаан болоход үл итгэгчид сая л нэг хагарал гарсныг хүлээн зөвшөөрчээ. Өнөөдөр өрнөдийнхөн Москва, Бээжингийн хооронд АНУ ба өрнөдийг сөрсөн холбоо үүсээд буйг үл анзааран дээрхийн эсрэг алдаа хийж байна. Зургадугаар сард Сингапурт болсон бага хурал дээр АНУ-ын Батлан хамгаалахын сайд Жим Маттис Хятад, Орос хоёрын ашиг сонирхол угаас үл нийцэх агаад тус хоёр улс бие биетэйгээ гэхээс илүү Америктай нийтлэг зүйл нь давамгайлна гэж ярьсан. Орос, Хятад хоёр хэзээ ч нөхөрлөж чадахгүй гэдэг бодол нь хүйтэн дайны үеийн коммунизм бол нэгдсэн, хөдөлгөж болшгүй цул зүйл гэдэг үзэлтэй адил буруу бөгөөд аюултай. Энэ хоёр улсын түргэн ойртож байгаа харилцааг өрнөдийн олон орон үл хайхарч байгаа ч Ерөнхийлөгч Владимир Путин, Ши Жиньпин нар бие биеэ урт үгсээр магтаж сайшаадаг боллоо.

Ноён Путины хэлснээр ноён Ши бол түүнтэй хамт төрсөн өдрийг нь хундага архитай тэмдэглэсэн цорын ганц гадаадын төрийн тэргүүн юм. Ноён Ши өөрийн зүгээс Хятадын найрамдлын медаль гардуулахдаа Оросын Ерөнхийлөгчийг “Хамгийн сайн, хамгийн дотно найз” гэж нэрлэсэн. Үүнийг үзүүлбэр төдийгөөр тайлбарлан үл ойшоож болох ч автократ удирдагчдын хоорондын ийм найрсал тус тусын системд үлэмж нөлөөтэй. Хоёр удирдагч наад зах нь 26 удаа уулзсанаас ноён Ши 2013 онд дээд удирдагч болсныхоо дараа анхны айлчлалаа Москвад хийсэн. Гэвч том ах ба бага дүүгийн байр солигдсонд Оросууд нэлээн эмзэглэдэг байж магадгүй. Гэхдээ Хятадын тал Оросын бахархлыг сэвтээхгүйн тулд маш хянуур хандан адил тэнцүү мэтээр ярьж, Путины амбицыг тэтгэхийн сацуу түүний олон зөвлөх, итгэлтэй хүмүүст ашигтай гэрээ санал болгодог. Хятад түүхий нефтийн импортоор дэлхийд тэргүүлдэг бөгөөд Орос улс хамгийн том нийлүүлэгч нь болсон. Бээжин ирээдүйд нефть, хийн хангамжаа баталгаажуулахын тулд Москвад олон тэрбумын зээл өгчээ. Хамгийн чухал нь оросоос бараа татахад Америкийн цэргийн хяналтад байдаг Малаккын хоолой, Адены булангаар дамжих шаардлагагүй.

Үүнээс ч илүү ач холбогдолтой нь хоёр улсын цэргийн хамтын ажиллагаа юм. Дөрөвдүгээр сард Хятадын Батлан хамгаалахын сайдаар томилогдсон Ей Фенгхе анхны гадаад айлчлалаа Москвад хийхдээ “Хятад, Оросын зэвсэгт хүчний хамтын ажиллагаа ямар нягт болохыг харуулахаар бид энд ирсэн. Бид та бүхнийг дэмжихээр ирсэн” гэж мэдэгджээ. Дахин хэлэхэд энэ бол зүгээр нэг найрсаг үг бус. Саяхныг хүртэл хятадын хөлгүүд эрэг хавийн уснаасаа холддоггүй байсан бол эдүгээ Япон тэнгисээс эхлээд газрын дундын тэнгис хүртэл Оростой хамтарсан сургуулилалт хийж байна. Хэдэн арван жилийн турш Москва Хятадад цэргийн дэвшилтэт техникээ худалдахаас татгалзаж ирсэн бол одоо уг бодлого ард үлдсэн. Тавдугаар сард Бээжин Оросын сүүлийн загварын байлдааны онгоцыг ардчилсан, өөртөө засах Тайваньд сүр хүчээ харуулахад ашиглав. Хоёр талыг ойртуулж буй хамгийн чухал хүчин зүйл нь үзэл суртал. Ноён Ши, Путин нар хүчирхэг автократ удирдагчид агаад төлөөллийн засаглалд зэвүүцэж, нэг л өдөр АНУ-ын дэмжлэгтэй “өнгөт хувьсгалаар” суудлаасаа хөөгдөнө гэж эмээдэг. Тэдний хамтын ашиг сонирхол нэмэгдэхийн сацуу АНУ ба АНУ төвтэй дэлхийн дэг журмыг сөрсөн харилцаагаа гүнзгийрүүлж буй.

Вашингтон тэдний харилцаа эвдэршгүй болохоос өмнө дунд нь гадас шаах боломж бий. 1960-аад оны Хятад, Зөвлөлтийн хагарлын бодит байдлыг зөвшөөрөхөөс татгалзсан явдал “даалууны онол” гэгчийг Вашингтонд зонхилоход хүргэсэн. Уг онол нь дэлхийн коммунизмыг тархахаас сэргийлэхийн тулд газар сайгүй сөрөн зогсох ёстой гэсэн үзэл юм. Хэрэв АНУ Ричард Никсоны санаачилгаас 10 жилийн өмнө Хятадтай харилцаагаа дулааруулсан бол Вьетнамын дайны гамшиг, Хятадын соёлын хувьсгалаас зайлсхийж чадах байсан байж магадгүй. Тасралтгүй дээшилж, АНУ-ын орыг залгах амбицаас үзэхэд Хятад улс Америкт Оросоос илүү урт хугацааны сорилт үүсгэнэ. 1972 онд Хятадтай харилцааг сайжруулах стратегийг үндэслэгч Хенри Киссенжер Никсоны Хятадын бодлогыг урвуулж, Москватай нөхөрлөн Бээжинг тусгаарлахыг Донольд Трампт зөвлөсөн гэдэг. Оросын оролцоо гэгчийг мөрдөн байцааж байгаа өнөөгийн нөхцөлд ноён Трамп ийм стратеги баримтлах бараг боломжгүй. Гэвч Америкийн төрийн байгууллагууд ба Трампыг залгамжлах хэн ч гэсэн шинээр төрж буй Хятад, Оросын холбоо АНУ-ын ашиг сонирхол хийгээд одоогийн дэлхийн дэг журамд ямар ноцтой аюул занал учруулж буйг хүлээн зөвшөөрөх хэрэгтэй болно.