A

Жижиг

A

Дунд

A

Том
http://zgm.mn/post/2441/

Ойр ойрхон нөхөн сонгуульдаж, орон нутгаа хөгжүүлье

Д.Гантулгын сулласан тойрогт гал гарсан тулаан болох нь тодорхой байна

 0 сэтгэгдэл

A

Жижиг

A

Дунд

A

Том
http://zgm.mn/post/2441/


Сонгуулийн зурхай гэхээр УИХ-ын сонгуулийн 42 дугаар тойрог буюу Хэнтий аймгийн хэрлэн, Мөрөн, Жаргалтхаан суманд болох нөхөн сонгууль санаанд бууж байна уу. Гэхдээ зурхайд тэнд хэн нэр дэвшээд, хэн сонгогдох тухай буугаагүй. Зурхайтай зурхайгүй нэр дэвшигчид тодорхой байна.

Харин нөхөн сонгуулийн ачаар Хэнтий аймгийн тулгамдсан асуудлуудыг /тулгамдаагүй байсан ч хамаагүй/ хэзээ хэзээнийхээс илүү анхаарч, шийдэж өгөх юм байна гэж зурхайд буулаа.

Хэнтийн нөхөн сонгуулийн санал авах өдөр нь зургадугаар сарын 30. Нийт 11 нам тус сонгуульд оролцох батламжаа аваад буй. Сонгуулийн хуанлигаар бол энэ сарын 31 гэхэд нэр дэвшигчид эцсийн байдлаар тодрох ёстой ч наана нь хэдийн тодорхой болж, сурталчилгаа нь ч албан бусаар эхэлчихлээ.

Нөхөн сонгуульд оролцох намууд батламжаа авснаас хойших ердөө долоо хоногийн дотор Хэнтий аймгийн төв дэх театрын царцсан барилга “гэсэж”, балгас болоод удаж буй дулааны цахилгаан станцыг шинэчлэх хүсэл биелж, хажууд нь уул уурхайн музей болон сургалтын бааз босохоор болчихлоо.

Сюрприз үүгээр дуусахгүй, дадал сумыг аймгийн төвтэй холбосон хатуу хучилттай 265 км замыг барих төсвийн мөнгө ч хэдийн шийдэгдсэн.

Жаргалтхаанд 47 жилийн өмнө баригдсан сургуулийн барилга хуучирч муудаад, хэзээ мөдгүй нурах гэж байж. Нөхөн сонгуулийн ачаар түүнийг нь “олж мэдээд” шинээр барихаар болсон бөгөөд хүрэлцдэггүй байсан эрчим хүчний чадлыг нэмэх мөнгийг нь ч цохчихлоо. Ерөнхий сайд үүнд шаардлагатай 3.2 тэрбум төгрөгийг шийдвэрлэх үүргийг Эрчим хүчний сайд Ц.Даваасүрэнд “газар дээр” нь өгсөн шүү. Жаргалтхааныхан шийдүүлж авсан томоохон асуудлуудыг л энд дурдаж байна. Шинэ фургон автомашинтай болсон гэх мэт жижиг сажиг бас бус зүйл бий бий.

Мөрөн сумынхан ч хоосонгүй. Газар тариалангийн бүс нутаг гэдгээрээ Мөрөнд таван га газрын усалгааны системийг шийдвэрлэж өглөө. Мөн трактор, 60-70 метрийн гүний худаг гаргаж бариулахаар болов. Түүнчлэн соёлын төв, ерөнхий боловсролын сургууль шинээр барьж байгуулна гээд бод доо. үгүй мөн сайхан аа. 

Өнөөдрөөс яг нэг жилийн өмнө уих-ын гишүүн асан Д.Гантулга бүрэн эрхээсээ татгалзаж, түүнийг нь парламент баталж байв.

“Залуу хүн нэг удаа алдаа л биз” гэж дотогшоо нэг өмөөрч, “за бас дэндүү юм” гэж гадагшаа нэг зэмлэсээр энэ парламентын түүхэн дэх хамгийн залуу гишүүнээ намын ах, эгч нар нь явуулсан нь 2018 оны зургадугаар сар. Түүнээс хойш Хэнтий аймгийн төвийн гурван сум төрд төлөөлөлгүй нэг жил болсон байна.

42 дугаар тойрогт багтдаг гурван сумын сонгогчдын 48 хувь нь Д.Гантулгад саналаа өгсөн. Гэвч тэр итгэлийг даасангүй, хүчингийн хэрэгт холбогдож хэнтийнхний сэтгэлийг гонсойлгов.

Д.Гантулга хүчингийн хэрэгт холбогдсоныг завшаан болгож бичих нь хаашаа юм, гэхдээ л тус тойргийнхон түүнд баярлах хэрэгтэй. Хэрэв нөхөн сонгууль болоогүй бол дээрх бүх сайхан зүйл шийдэгдэлгүй асуудал хэвээрээ л үлдэх байсан шүү. Д.Гантулга өөрөө байгаад ч энэ мэт том том асуудлуудыг шийдүүлж чадахгүй байсан гэдэгт барьсан ч алдахгүй.

Эндээс харахад ард түмний элчийн үүргээ умартсан гишүүдийг эргүүлэн татаад, ойр ойрхон нөхөн сонгууль хийгээд байвал орон нутгийн орхигдсон асуудлууд нүд ирмэх зуур шийдэгдэх юм биш үү. Санааны зоргоор болдогсон бол юуны өмнө аймгуудын өрсөлдөх чадварын үзүүлэлтэд сүүл мушгидаг Архангай, Говь-Алтай, Дундговь, Булган зэрэг аймгуудад нөхөн сонгууль явуулах хэрэгтэй.

Хэнтийн нөхөн сонгуулийг зохион байгуулахад Засгийн газрын нөөц сангаас 280 орчим сая төгрөг зарцуулж байгаа. Мөн зохион байгуулалтад өдий төдий төрийн албан хаагчид дайчлагдан ажиллана гээд төвөг чирэгдэл учруулж байгаад иргэд бухимдаж буй. Бас Хэнтийнхэн нутгийн нэр хүнд унагалаа гэж Д.Гантулгад их л дургүй байх болсон гэдэг. Гэлээ гээд яахав, нөхөн сонгуулийн ачаар өчнөөн асуудлаа шийдүүлж, улс төрийн томоохон намуудын лидерүүд танай нутагт “хайр зарлаж” байгааг нь бодолцоод дахин УИХ-д сонгодоггүй юм аа, уураа гаргахаа л байчих. Товчхондоо хэн ч ялсан ялгаагүй болж байгаа нь л чухал шүү дээ.

Ардчилсан чөлөөт сонгуулийг хийдэг болсноос хойш Монгол улсад хэд хэдэн удаа нөхөн сонгууль болж байсан.

1997 онд анх удаа Завхан аймгийн 21 дүгээр тойрогт нөхөн сонгууль болжээ. Үүнийг УИХ-ын гишүүн байхдаа Ерөнхийлөгчийн сонгуульд өрсөлдөж, ялалт байгуулсан Н.Багабандийн орны хүнийг сонгохын тулд зохион байгуулсан юм. Тус сонгуульд МАХН (одоогийн МАН)-аас нэр дэвшсэн, экс Ерөнхийлөгч Н.Энхбаяр 72.6 хувийн саналаар УИХ-ын босгыг хоёр дахиа давсан түүхтэй.

Тэрбээр үргэлжлүүлэн тасралтгүй дөрөв дэх парламентынхаа нүүрийг үзсэн бөгөөд 2005 онд гурав дахь Ерөнхийлөгчөөр сонгогдсоноор УИХ-д нэг суудал эзгүйрсэн юм. Баянгол дүүргийн 65 дугаар тойрогт явуулсан тус сонгуульд нийт зургаан хүн нэр дэвшсэнээс УИХ-ын дарга асан, тухай үед хотын даргаар ажиллаж байсан М.Энхболд 77.1 хувийн саналаар илүүрхэж байлаа.

Хамгийн сүүлд буюу 2009 онд явуулсан сонгууль ч парламентын гишүүн төрийн тэргүүнээр сонгогдсонтой холбоотой. Монгол Улсын дөрөв дэх Ерөнхийлөгчөөр сонгогдсон Ц.Элбэгдоржийн УИХ-д үлдээсэн суудлын төлөө нөхөн сонгуулиудын түүхэн дэх хамгийн олон буюу найман хүн өрсөлдөж, Эрдэс баялаг, эрчим хүчний сайд асан Д.Зоригт ялалт байгуулсан билээ.

Харин 1998 онд С.Зориг агсны амь насыг бүрэлгэсэн аймшигт хэргийн дараа зохион байгуулсан нөхөн сонгуульд түүний төрсөн дүү с.оюун нэр дэвшин сонгогдож байлаа.

2001 онд нисдэг тэрэгний ослоор өөд болсон Ш.Отгонбилэг агсны тойрогт болсон нөхөн сонгуульд түүний эхнэр, одоогийн УИХ-ын гишүүн О.Содбилэгийн ээж Д.Туяа ялалт байгуулж байв.

• Ард түмний элчийн үүргээ умартсан гишүүдийг эргүүлэн татаад, ойр ойрхон нөхөн сонгууль хийгээд байвал орон нутгийн орхигдсон асуудлууд нүд ирмэх зуур шийдэгдэх юм биш үү. 

• Д.Гантулгын сулласан тойрог дээр болж буй сонгуульд хүчтэй, бяртай, нөлөөтэй улстөрчид өрсөлдөж байгаа гэдэг утгаараа гал гарсан “тулаан” болно гэдэг маргаангүй. 

• Нөхөн сонгуульд оролцох намууд батламжаа авснаас хойших ердөө долоо хоногийн дотор Хэнтий аймгийн тулгамдсан асуудлууд илбэдүүлсэн юм шиг л шийдэгдэж байна.

2002 онд төв аймгаас сонгогдсон С.Гончиг өвчний улмаас хорвоогийн мөнх бусыг үзүүлж, тус тойрогт болсон нөхөн сонгуулиар хотын дарга асан Су.Батболд парламентын босгыг давж байсан юм билээ. Тэгвэл 2006 онд хөвсгөлөөс сонгогдсон О.Энхсайхан агсан өөд болсны дараа өнөөгийн шадар сайд Ө.Энхтүвшин нөхөн сонгуульд ялалт байгуулж байв.

Эндээс харахад нөхөн сонгуулиуд төрийн тэргүүнээс сонгогдсон эрхмүүдийн суудлыг бөглөхийн төлөө гурван удаа болсон байна. Мөн ослоор, өвчнөөр, цаг бусаар өөд болсон гишүүдийн тойргийн нөхөн сонгуулиудад тэдний төрөл төрөгсөд, хамаатан садан, ойр дотны нөхөд сонгогддог нь монголчуудын талийгаачдаа хүндэтгэлтэй ханддагийн илрэл гэлтэй.

Харин Хэнтийн 42 дугаар тойргийн хувьд нөхөн сонгууль хийх болсон нөхцөл нь өөр. сайрхаад эсвэл дурсаад байх асуудал биш учраас давтаж хэлээд юугхэв. Харин Д.Гантулгын сулласан тойрог дээр болж буй сонгуульд хүчтэй, бяртай, нөлөөтэй улстөрчид өрсөлдөж байгаа гэдэг утгаараа гал гарсан “тулаан” болно гэдэг маргаангүй. Тиймдээ ч 52 хоногийн дараа болох санал хураалтаас өмнө тэд хэнтийнхэнд өдөр бүр “хайр”-аа илэрхийлж, хаялга өгсөөр байна гэдэг л тодорхой.

A

Жижиг

A

Дунд

A

Том

Д.Эрдэнэбат: 2020 оны сонгууль руу чиглэсэн үйл ажиллагаа эхэлж байна

 0 сэтгэгдэл


УИХ-ын гишүүн Д.Эрдэнэбатыг прокуророос яллагдагчаар татах тогтоолыг АТГ-т ирүүлжээ. Уг тогтоолтой тэрбээр танилцсан талаараа хэвлэлийнхэнд мэдээлэл өгсөн юм.

“Эрдэнэт” үйлдвэрийн 49 хувийг ОХУ-ын “Ростех” компаниас худалдан авсантай холбогдуулан түүнийг яллагдагчаар татсан аж.

Тэрбээр хэлэхдээ “АТГ надаас гэрчийн мэдүүлэг авсан. Дараа нь маш шуурхай яллагдагчаар татах тухай прокурорын 75 тоот тогтоол гарсан. Иргэнийхээ хувьд энэ тогтоолтой хууль журмын дагуу танилцаж гарын үсэг зурлаа. Гэтэл өчигдөр мөрдөн байцаагчтай уулзаж тогтоолтой танилцсаны дараа хэвлэлээр ялын үндэслэл, яллагдагчаар татсан тухай эх сурвалж нь тодорхойгүй мэдээлэл тархсан. Эрүүгийн хуульд аливаа нэгэн мэдээллийг өгөхдөө прокурорын зөвшөөрөл өгөх ёстой. Би ч бас иргэнийхээ хувьд уг асуудлыг хуулийн дагуу, ямар нэг улс төргүйгээр, олон нийтэд дулиан дэлгэхгүйгээр асуудалд хандаж ирсэн. Гэтэл яагаад процесс хуулийн дагуу явж байхад эх сурвалжгүй, үндэслэлгүй мэдээллийг зорилготой тараах болов гэдэг нь анхаарал татаж байна. Яг тэр өдрийн болсон үйл явдлыг ажиглаад харж байхад Л.Оюун-Эрдэнэ сайд хөгжлийн банкны асуудлаар, мөн энэ хэрэгтэй холбоотой асуудлаар, Ч.Хүрэлбаатар сайд “Эрдэнэт”ийн 49 хувьтай холбоотой асуудлаар нийтэд мэдээлэл хийсэн. Энэ бүгдийг уялдуулаад харахад улстөржсөн шинж агуулагдаж байна гэх дүгнэлтэд хүрч байна. Тийм учраас би өнөөдөр АТГ-ын дарга, Ерөнхий прокурорын газарт хүсэлт хүргүүлж байгаагаа албан ёсоор мэдээлж байна” гэлээ.

Хүсэлтэд Эрүүгийн хянан шийдвэрлэх тухай хуульд хэрэг бүртгэл мөрдөн байцаалтын материалыг прокурорын зөвшөөрснөөр прокурорын мэдэгдэх бололцоотой гэсэн хэмжээгээр нийгэмд мэдээлж болно гэсэн заалтыг ноцтой зөрчсөн байна. Иймд Эрүүгийн хянан шийдвэрлэх тухай хуулийг зөрчиж хэрэг бүртгэл мөрдөн байцаалтын шатанд байгаа хэргийн талаар олон нийтэд мэдээлсэн явдлыг хяналтдаа авч шалгаж өгнө үү хэмээжээ. Түүнээс гадна АТГ-ын дарга З.Дашдаваад “Яг энэ үндэслэлээр зөвшөөрөлгүйгээр хууль зөрчин олон нийтэд эх сурвалжгүй мэдээлэл дэлгэн улстөржсөн үйл ажиллагаа явуулсныг анхааралдаа авна уу” гэсэн хүсэлт дахин явуулж байгаа гэв.

Харин “Эрдэнэт” үйлдвэрийн 49 хувийг Монголын компани худалдан авсан тухайд тэрбээр “Эрдэнэт”-ийн 49 хувийн худалдан авалт Монгол Улсад ямар ч хохирол авчраагүй. Гэтэл онц ноцтой хохирол учруулсан мэт худал үндэслэл гаргаж байгаа нь буруу. Үүгээр “Эрдэнэт” үйлдвэрт өмнө нь гардаг байсан хулгай луйврын хэргийг хаацайлах оролдлого хийж байгаа мэт харагдаж байна. Өнөөдөр нийгэмд байгаа үнийн хөөрөгдөл, архидалт, гэмт хэрэг, өвчин зэрэг асуудлыг намжаах гэсэн арга болжээ” гэв.

A

Жижиг

A

Дунд

A

Том

Ерөнхийлөгч Х.Баттулга УИХ-ыг тарахыг дахин шаардлаа

УИХ-ын гишүүд ард түмний төлөөлөл байх ёс зүйн чадамжаа үндсэндээ алдаад байна

 0 сэтгэгдэл


УИХ-ын 49 гишүүн ЖДҮХС-гийн хөрөнгөөс жилийн гурван хувийн хүүтэй зээлийг нэн хөнгөлөлттэй нөхцөлөөр өөртөө авсан, өөрсдийн эрх ашигт нийцүүлэн өөрчлөх замаар гэмт этгээдүүдийг “хөөн хэлэлцэх хугацаа дууссан” гэх нэрийдлээр хуулийн хариуцлагаас мулталсан, хүчин, хүн амины хэрэгт нэр холбогдох, авилгын гэмт хэрэгт сэрдэгдэх нь улам бүр даамжирч УИХ-ын гишүүд ард түмний төлөөлөл байх ёс зүйн чадамжаа үндсэндээ алдаад байна гэж үзээд УИХ-ыг өөрөө тарах саналыг Ерөнхийлөгч Х.Баттулга дахин гаргалаа.

Тэрбээр хагас жилийн өмнө мөн УИХ-ыг өөрөө тарах санал гаргаж байсан юм. харин энэ удаа “...Наад зах нь төрийн ордны тухай хуулийн заалтуудыг ноцтойгоор зөрчиж, албан тасалгаандаа согтууруулах ундаа хадгалах, хэрэглэх байдал даамжирснаас эрдэнэт хүний амь сүйдэх нөхцөл ч үүсжээ. Та бүхний батлан гаргасан татварын багц хуульд хүний эрх, эрх чөлөөг хясан боогдуулах зүйл, заалт өчнөөн олноор орсон. Сангийн сайд нь өөртөө шүүх эрх мэдлээс давсан олон боломж гаргасан, бизнес эрхлэгчдийн өмчлөх, чөлөөтэй зорчих эрхэд халдсан, иргэншлийн ололт болсон хязгаарлагдмал хариуцлагатай компанийн суурь зарчмыг эвдсэн олон заалтыг бусдын нөлөөлөлд автсан байдлаар оруулсныг УИХ асар хайхрамжгүйгээр, хянан үзэлгүйгээр баталлаа” гэв.

Тэрбээр хагас жилийн өмнө мөн УИХ-ыг өөрөө тарах санал гаргаж байсан юм

Тиймээс ёс зүйгүй явдал, увайгүй хандлагын үлгэр жишээ болсноос бус, ард олныг итгүүлэн үнэмшүүлэх, сайн сайханд манлайлан дагуулах чадваргүй болсон УИХ-ыг өөрөө тарахыг уриалж байна гэдгийг Монгол Улсын Ерөнхийлөгч Х.Баттулга онцоллоо.

A

Жижиг

A

Дунд

A

Том

Ардчилсан нам эрх баригчдын эсрэг жагсана гэв

10 сая ам.долларын авлигын дуулианы араас дахин нэг сайд 1.2 сая еврогийн хэрэгт холбогдсон гэв

 0 сэтгэгдэл


АН-ын удирдлагууд Засгийн газрыг огцруулахаар бүтэн сарын турш жагсаал, цуглаан зохион байгуулах болсон талаараа мэдэгдлээ.

Тус намын дарга С.Эрдэнэ Засгийн газрыг огцруулах болсон үндэслэлийг хэд хэдэн шалтгаанаар тайлбарлав. Тэрбээр “АН-ын зүгээс сарын өмнө жагсаал цуглаан хийж, эрх баригчдад шаардлага хүргүүлсэн. Шаардлагын хариуг өгч, арга хэмжээ авахгүй байсаар өнөөдрийг хүрлээ. Өнгөрсөн шөнө гэхэд шатахууны үнэ өслөө. Үнийн өсөлтийг хязгаарлахад төрийн бодлого үгүйлэгдэж байна. Мах болон хүнсний өргөн хэрэглээний бараа бүтээгдэхүүний үнэ өдрөөр биш, цагаар өсөж байна. Тиймээс хариуцлагагүй УИХ, Засгийн газарт хариуцлага тооцох хэрэгтэй.

Мөн нийгмийг хамарсан халдварт өвчин хэн хүнийг ялгахгүй нийгэмд аюул занал учруулж байна.

Сүүлийн үед сурагчдын дунд сүрьеэгийн өвчлөл нэмэгдэж байгаа нь эрүүл мэндийн салбарын бодлого алдагдсаны илрэл. Өнөөдөр хуульгүй, шүүхгүй юм шиг авирладаг асуудал хэрээс хэтэрлээ. 10 сая ам.долларын авлигатай холбогдсон сайдын асуудал дарагдаагүй байхад 1.2 сая еврогийн авлига авсан хэрэг асуудал сөхөгдөөд эхэллээ. ЖДҮХС-гаас олон зуун сая, тэрбумаар нь завшсан сайдуудын нэгэнд нь ч хариуцлага тооцсонгүй. шударга ёсны билэг тэмдэг болж томилогдсон хуулийн байгууллагын шинэ удирдлагууд арга хэмжээ авахгүй байна. Концессын 800 гаруй тэрбум төгрөгийн асуудал, хүчирхийлэгчийн асуудал, төрийн яаманд болсон аллагатай холбоотой асуудал гээд олон хэрэг шийдэгдсэнгүй. Тиймээс  үүний эсрэг нийтээрээ тэмцэх шаардлагатай гэж АН-ын гүйцэтгэх зөвлөлөөс үзэж байна” гэсэн юм.

Түүний хэлсэн үг, Засгийн газрыг огцруулах үндэслэл үүгээр зогссонгүй. АН-ын зүгээс “Эрдэнэт” үйлдвэрийн 51 хувийг барьцаалсан хэргийг эрх баригчид замхруулах чиглэлд явж байгаад шүүмжлэлтэй хандаж байна. Стандарт банкны өрийн эхний 40 сая ам.долларын төлбөрийг татвар төлөгчдийн мөнгөөр төлж, үлдэгдэлд нь 40 сая ам.долларын зэсийн баяжмалыг зуучлагч компанид өгөх тохироо хийсэн дуулдаж байгаа тухай АН-ын дарга мэдэгдсэн. Мөн тэрбээр “үүний цаана ямар луйвар нуугдаж байгааг татвар төлөгчид мэдэх эрхтэй. “Эрдэнэт”-ийг барьцаалсан “Жаст”-ын Ш.Батхүү нарын хэргийн хөөн хэлэлцэх хугацаа ирэх жил дуусна. үүнийг хэрэг хөөн хэлэлцэх хугацааны өөрчлөлтөөр аргалахаар хүлээж байна” гэж мэдэгдэв.

• Ирэх долоо хоногийн пүрэв гарагт АН-аас бүх нийтийн эсэргүүцлийн жагсаал зохион байгуулна. 

• 10 сая ам.долларын авлигатай холбогдсон сайдын асуудал дарагдаагүй байхад 1.2 сая еврогийн авлига авсан хэрэг сөхөгдөж эхэллээ. 

• “Эрдэнэт”-ийг барьцаалсан “Жаст”-ын Ш.Батхүү нарын хэргийн хөөн хэлэлцэх хугацаа ирэх жил дуусах тул хэрэг хөөн хэлэлцэх хугацааны өөрчлөлтөөр аргалахаар хүлээж байна” гэв.

Дээрх үндэслэлүүдийг нэгтгээд АН жагсаал зохион байгуулах шийдэлд хүрсэн аж. Тиймээс тавдугаар сарын 30-нд бүх ард түмний эсэргүүцлийн жагсаалыг зохион байгуулж, Засгийн газар бүрэлдэхүүнээрээ огцрохыг шаардах аж. Мөн УИХ дахь АН-ын зөвлөл Б.Пүрэвдорж гишүүний Монголбанкны ерөнхийлөгчийг огцруулах хүсэлтэд анхаарал хандуулахаа илэрхийлсэн. Ийнхүү мэдээлэл хийсний дараа сэтгүүлчдийн асуултад хариулт өглөө.

-АН-ын зөвлөлийн дарга Д.Эрдэнэбатыг яллагдагчаар татсан гэсэн мэдээлэл гарлаа. Энэ үнэн үү?

-Эрдэнэбат гишүүнийг яллагдагчаар татсан гэх мэдээлэл албан бус. Харин өчигдөр хууль хяналтын байгууллагаас дуудаж уулзсан гэсэн. Ямар учраас дуудсаныг мэдэхгүй байна. Өөрөө энэ тухай тодорхой тайлбараа өгөх байх.

-Хэнтий аймагт нэр дэвшигчийг энэ сарын 24-28-ны өдрүүдэд тодруулах ёстой. АН нэр дэвшигчээ хэзээ тодруулах вэ?

-Манай нам хуулийн хугацаанд нэр дэвшигчээ тодруулж, сонгуулийн хороонд бүртгүүлнэ. Энэ сарын 27-нд үндэсний бодлогын хороо хуралдаж, нэр дэвшигчийг тодруулна. Түүнээс гадна үндсэн хуулийн цэц дээр маргаан үүссэн байгаа. Үүнийг эрх баригч намын давхар мэх гэж харж байгаа. Нөхөн сонгуулийг эрх баригчид өөрсдөдөө ашигтайгаар эргүүлэх, үгүй бол Цэцийг ашиглаж нөхөн сонгуулийг хүчингүй болгох санаатай байна гэж харж байна.

-АН-ын дэд дарга Г.Батхүүгийн нас барсан хэсэгт камер байхгүй гэсэн. Гэхдээ Төрийн ордонд нууцын зэрэглэлтэй хэд хэдэн камер байгаа гэдгийг хэлэх хүмүүс байна. Танай намынхан камер байгаа эсэхийг шалгаж үзэв үү?

-Төрийн ордонд нууцын зэргэлэлтэй камер хаана байгааг мэдэхгүй байна. Төрийн ордны хамгаалалтын албан дарга “гишүүдийн халдашгүй байдалтай холбоотойгоор камер байрлуулах боломжгүй байдаг” гэж хэлсэн. Ардчилсан намын дэд дарга Г.Батхүү агсны хэрэг явддыг тохиолдлынх биш гэж үзэж, мэдэгдэл гаргасан. Үүнийг хуулийн байгууллагаас яаралтай шударгаар тогтоож, олон нийтэд мэдээлэхийг шаардсан. Тухайн үед зориудаар хэрэг гарсан оройноос талийгаачийг бие муутай байсан, зүрх нь өвдсөн гэх мэдээллийг маш шуурхай тарааж эхэлсэн. Энэ бол олон нийтийн анхаарлыг сарниулах гэсэн зорилготой мэдээлэл. Үүний цаана жинхэнэ сэдсэн, гүйцэтгэсэн, захиалсан хүмүүс байх магадлалтай гэж бид хардаж байгаа учраас хуулийн байгууллага энэ хэргийг шударгаар шийднэ гэдэгт итгэж байна.

A

Жижиг

A

Дунд

A

Том

2020 онд “Ирээдүйн өв сан”-д нэг их наяд төгрөг хуримтлагдана

Аудитын албан тушаалтнууд цалингаа нэмүүлэх хүсэлт ирүүлжээ

 0 сэтгэгдэл


Ерөнхийлөгч Х.Баттулга татварын ерөнхий хууль, Аж ахуйн нэгжийн орлогын албан татварын тухай хууль, Хувь хүний орлогын албан татварын тухай хууль болон эдгээрийг дагалдаж батлагдсан хуулиудад бүхэлд нь тавьсан хоригийн хэлэлцэх хугацааг хойшлуулах хүсэлтийг төсвийн байнгын хороонд ирүүлжээ. Тиймээс ирэх даваа гарагт уг асуудлыг хэлэлцэнэ гэж тус байнгын хорооны дарга Б.Чойжилсүрэн мэдэгдсэн юм.

Үргэлжлүүлээд тус хуралдаанаар Монгол Улсыг 2020 онд хөгжүүлэх үндсэн чиглэлийг хэлэлцэв. Ирэх оны үндсэн чиглэлд тусгагдсан арга хэмжээнүүдийг хэрэгжүүлэхэд нийт 10 их наяд 216.3 тэрбум төгрөг шаардлагатай байгаа аж. Улсын төсвийн хөрөнгөөр нэг их наяд 325.5 тэрбум төгрөг, гадаад эх үүсвэрээс хоёр их наяд 111.9 тэрбум төгрөг болон төр, хувийн хэвшлийн түншлэл, хувийн хөрөнгө оруулалтаар зургаан их наяд 174.2 тэрбум төгрөг, бусад эх үүсвэрээс 604.7 тэрбум төгрөгийг тус тус санхүүжүүлэхээр Сангийн яам төлөвлөсөн байна. 

Ингэснээр эдийн засгийн бодит өсөлт зургаан хувь, инфляцын түвшин найман хувиас ихгүй, төсвийн алдагдлын ДНБ-д эзлэх хэмжээ 5.1 хувиас хэтрэхгүй, ажилгүйдлийн түвшин 6,5 хувиас бага байна гэж тооцоолжээ.

Мөн төсвийн тухай хуулийн дагуу тогтворжуулалтын сан, ирээдүй өв сангаар дамжиж хуримтлал бий болдог. Эдгээр сан 2019 оноос өргүй болж эхлэх аж. Ирээдүйн өв санд 2019 онд батлагдсан төсвөөр 553 тэрбум төгрөг, 2020 онд нэг их наяд гаруй төгрөг хуримтлагдахаар тооцсон байна.

Түүнчлэн зээлийн хүүг захиргааны аргаар бууруулахад хүндрэл үүсдэг гэж Сангийн сайд хэлэв. “2016 онтой харьцуулахад зээлийн хүү гурван пунктээр буусан. Улсын их Хурлаас баталсан татварын тухай хуулийн шинэчилсэн найруулгад гадны хөрөнгийн эх үүсвэрийг оруулж, гарахад 10 хувийн татвар авдаг байсныг хоёр дахин бууруулж таван хувь болгосон.

Ингэснээр зээлийн хүүг бууруулахад чухал нөлөө үзүүлнэ. Мөн УИХ-д өргөн мэдүүлсэн гадны банк оруулахад эрх зүйн орчныг зохицуулах хуулийг шуурхай баталбал зээлийн хүү буурах боломжтой” гэж Ч.Хүрэлбаатар сайд онцолсон.

Төсвийн байнгын хороогоор хэлэлцсэн дараагийн асуудал нь “Төрийн аудитын байгууллагын албан хаагчдын албан тушаалын цалингийн хэмжээг тогтоох тухай” төсөл байв.

Төрийн өндөр албан тушаалтны зэрэг зиндаа, түүнтэй адилтгах төрийн албан тушаалын зэрэглэлээр Монгол Улсын Ерөнхий аудиторын албан тушаалын зэрэг нь ТӨ-IVA-д заасан адилтгах албан тушаалын зэрэглэлд хамрагддаг.

Зээлийн хүүг захиргааны аргаар бууруулахад хүндрэл үүсдэг

Энэ нь Монгол улсын Ерөнхий прокурорын албан тушаалын ангилал зэрэглэлтэй адил аж.

Мөн саналд цалинг нэмэгдүүлэх санал болон судалгааг хавсаргасан байна. Энэ судалгаагаар үндэсний аудитын газрын нэг албан хаагчийн албан тушаалын дундаж цалин нь ерөнхий прокурор, АТГ, шүүхийн байгууллагын албан тушаалын дундаж цалингаас 14-54 хувь бага байгаа аж.

Аудитын байгууллагын албан хаагчид нь дээрх байгууллагын албан хаагчдын адил нотлох баримтад тулгуурлаж ажилладаг ба аудитын байгууллагаар илэрсэн зөрчлийн нотлох баримтад тулгуурлан хууль хүчнийхэн мөрдөн шалгах үйл ажиллагаа явуулдаг. Иймд цалинг тогтоохдоо аудитын байгуулагыг хараат бусаар, бие дааж ажиллах боломжийг хангах нь зөв юм гэжээ.

Өнөөдрийн байдлаар Ерөнхий аудиторын цалин 1.7 сая төгрөг байгаа аж. Харин Ерөнхий прокурорынх 2.2 сая байгаа юм. Тиймээс цалинг 1,879.350 төгрөг болгон нэмэгдүүлэх саналыг ирүүлжээ.

Түүнээс гадна Ерөнхий аудиторын орлогч, ҮАГ-ын тамгын газрын дарга, газрын захирал бөгөөд тэргүүлэх аудитор, газар, хэлтэс, албаны дарга…гэх мэт албан тушаалтан, шинжээч, менежерүүдийн цалинг нэмүүлэх хүсэлт ирүүлснийг төсвийн байнгын хорооны гишүүд дэмжлээ.