A

Жижиг

A

Дунд

A

Том
http://zgm.mn/post/2179/

“Оюутолгой”-г алах уу, аврах уу гэдгээ ҮАБЗ шийднэ

Оюутолгой төсөл бол Монгол Улсын эдийн засгийн аюулгүй байдлын баталгаа

“Оюутолгой”-г алах уу, аврах уу гэдгээ ҮАБЗ шийднэ
 0 сэтгэгдэл

A

Жижиг

A

Дунд

A

Том
http://zgm.mn/post/2179/


Дахиад л ОЮУТОЛГОЙ-н сэдвийг хөндөхгүй бол надаар дутах юм шиг санагдаад ер болдоггүй шүү. Үнэхээр үйлийн үртэй төсөл юм аа. Бүр хамгийн зовлонтой сэдэв гэсэн ч болно. Хүний өөрийнгүй мах мариагаа жинхэнэ барж байгааг нь хараад, дуугүй явж чадахгүй байгаа учраас хошуу, хуруу нэмэх ёстой болов. Үнэндээ Монголд Оюутолгойн талаар мэддэггүй хүн огт үгүй шигээ бас мэдэж байгаа хүн ч алга байх шиг санагддаг. Ийнхүү улиг болсон сэдэв хэрнээ огт хуучирдаггүйн учир шалтгаанаас оюутолгой өөрөө асар хаялгатай, асар нөлөөтэй, үр өгөөжтэй, үнэ цэнтэй, басхүү алдартай, маш дуулиантай төсөл гэдэг нь тодорхой харагддаг. Гэтэл энэ гоё нэрийг нь сонсоход л захын хүний тархинд хэзээ ч дуусдаггүй хэрүүл маргаан, будилаан гэсэн ойлголт хамгийн түрүүнд харваж ирдэг болчихжээ. Яагаад. Оюутолгой төсөл монголд ямар ч ашиггүй, бидний мэдлэггүй, туршлагагүйг далимдуулан шулсан ямар ч хэрэггүй, цаашид хойч үеийнхэндээ хувь заяаг нь даатган үлдээх нь зөв хэмээн бидний ярих болсон ТӨСӨЛ мөн гэж үү. Би энэ сэдвийг хөндөж бичихдээ өөрөөсөө яг ингэж асуулаа. Хэрэв зэ, хэн нэгэн тоож миний бичсэнийг уншиж байгаа бол өөртөө яг энэ асуултыг тавиад хариулахыг хичээгээрэй гэж хүснэм. Намайг шүүмжилж, буруутгах басхүү зөвтгөх, санаа нийлэх эсэх таны дурын хэрэг. Оюутолгой төслийн ач холбогдлыг маш сайн мэддэг хэрнээ дуугардаггүй улстөрчид, эрдэмтэд олон болж байгаа нь надад хамгийн харамсалтай санагддаг. Энэ төслийн талаар наад захын ойлголтгүй хэрнээ монголчуудын тархийг угааж, харанхуй мэдэмхийрдэг улстөрчид улам “моодонд” ордог болж байгаад гутдаг юм. Энэ сэдвээр хамгийн чанга хашхирч ярьсан хүн өнөөдөр парламентын гишүүн, сайд болж байгаа нь үнэн. Бас төслийг хамгийн сайн эсэргүүцэх тусам улстөрчдийн нэр хүнд нэмэгдэж, ахуй амьдрал нь сайжирдаг болсон. өөрөөр хэлбэл, бодит үнэний төлөө биш хар масс-д таалагдах популизм хийдэг, ярьдаг хүмүүс монголчуудад асар таалагддаг болсон болохоор хоосорч, ядуурч хорссон болгонд тэдний сүржин, хоосон үг яриа үнэнийг орлож хүрдэг болчихлоо. Тэгвэл тэднийг үнэн голоосоо үзэн яддаг болохоор, бас тийм попрогчидтой хамсан, худалдагдсан үзэл суртлаараа нийгмийг хордуулан, бузарлагчдыг сайн мэддэг болохоор тэдний тарьж, түгээж, үлдээж буй лай ланчигт сэтгэл зовнидог монгол хүний нэг болохоор Оюутолгой төслийн ач холбогдол, бидэнд өгсөн, цаашид өгөх үр өгөөжид би огтхон ч эргэлздэггүй.

Ийн өгүүлэхийн учир УИХ-аас яг нэг жилийн өмнө оюутолгой төслийн хөрөнгө оруулалтын гэрээний хэрэгжилтийг шалгаж, санал дүгнэлт гаргах үүрэгтэй 60 гаруй гишүүнтэй нүсэр ажлын хэсэг томилсон юм. Ажлын хэсэг бүтэн жил үргэлжилсэн шалгалтаа дуусган дүгнэлтээ өнгөрсөн долоо хоногийн сүүлээр амжиж үндэсний аюулгүй байдлын Зөвлөлд хүргүүлжээ. Ингэснээр ажлын хэсгийн дүгнэлтээс Оюутолгой төслийн цаашдын хувь заяа хамаарах учиртай болж байна гэж ойлгож болох нь. Нэг талаасаа энэ бол Монгол Улсын, монголчуудын хувь заяатай холбоотой маш даажинтай үйл явдал болж мэдэхээр харагдаж байна.

УИХ, ҮАБЗ нь Монгол Улсын тусгаар тогтнол, үндэсний аюулгүй байдал, ардчилал, эрх чөлөөт нийгмийн төлөө шийдвэр гаргах эрхтэй институцынхаа хувьд ажлын хэсгийн дүгнэлтийг хүлээж авах нь зөв. Монгол Улсын тусгаар тогтнол, аюулгүй байдал юугаар хангагдаж, яаж баталгааждаг бол гэдгийг уншигч авхай хэрхэн бодож байгааг тааж мэдэхгүй болохоор энэ талаар олж уншсан, мундаг хүмүүсийн хэлж ярьж байгаа болгоноос сонсож авсан өөрийн ойлголтоо сэтгүүлчийн байр сууриас хандаж хуваалцахыг хүслээ. Аль ч улс орны тусгаар тогтнол, аюулгүй байдал бол улс төр, эдийн засгийн аюулгүй байдлаа хэр найдвартай хангасан эсэхээс шалтгаалдаг, бас баталгааждаг болохыг бид мэднэ. Тэгвэл Монгол Улс маань тусгаар тогтносон бөгөөд өөрийн газар нутагтай, хил хязгаартай, цэрэг армитай, хоёр хөрштэйгөө ямар нэгэн маргаан будилаангүй, ястан үндэстний зөрчил тэмцэлгүй, шашны ялгаварлалгүй, дотоодын хямрал, тулаангүй, магадгүй өнөөгийн дэлхий дээрх хамгийн амар амгалан цөөн улс орны нэг.

Хийснээ тэгээд энэ олон жилд хэн нь сайжруулсан юм бэ

Өөрөөр хэлбэл, бидний улс төрийн аюулгүй байдал бүрэн баталгаажсан байна гэсэн үг. Гэтэл эдийн засгийн аюулгүй байдал найдвартай байна уу, гэдгийг бодоод үзэхэд ямар эмзэг байгааг нь л мэдэрдэг. Өнөөдөр Монгол Улсын эдийн засгийн аюулгүй байдал юугаар баталгаажиж байгааг хэлэх гээд оролдоод үз дээ. Тухайн улсын эдийн засгийн аюулгүй байдлыг гадаад худалдаа нь илтгэдэг гэдэг. Тэгвэл зөвхөн нүүрс, алт, зэс, цайр, малын мах, ноос ноолуур гэсэн тодорхой хэдхэн нэр төрлийн бүтээгдэхүүний экспорт дээр монголын гадаад худалдаа оршин тогтнож байна. Эндээс олсон чөлөөт валютаа буцаагаад импортод зуун хувь зарцуулна. Нефть, бензин, эрчим хүч, хоол хүнс худалдаж аваад л дуусгачихдаг улс шүү дээ бид. даанч ядруухан байгаа биз. Шуудхандаа эдийн засгийн тусгаар тогтнолын хувьд бид хоёр хөршөөсөө хараат болсон байна гэсэн үг. Хөнгөн, хүнд үйлдвэр, газар тариалан, барилга, зам, хоол унд маань үндсэндээ хятад улсаас 70-80 хувь хамаардаг болсон.

Цаашдаа өмнөд хөрштэй хийх гадаад худалдааныхаа хэмжээг 10 тэрбум ам.долларт хүргэж өсгөнө гэж байгаагаа Засгийн газар мэдэгдсэн. Оросуудын галуут нуураас нийлүүлж буй эрчим хүч, нефтийн бүтээгдэхүүн, хятадын худалдаж авч байгаа нүүрсний квот дээр л манай улсын эдийн засгийн аюулгүй байдал оршин тогтож байна.  Тэгэхээр бидний эдийн засгийн аюулгүй байдлын хил хязгаар, тусгаар тогтнолын тухай ярих цаг болсон байгаа биз. Эдийн засгийн тусгаар тогтнолынхоо төлөө монголчууд бид ямар нэгэн алхам хийх хэрэгтэй болчихоод байгаа атлаа огт хөдлөхгүй байгааг гайхан анзаарч байгаа хүн байна уу гэж асуумаар. Нөгөө Эгийн гол, Шивээ Овоо, Багануур, Оюутолгойн цахилгаан станцын төслүүд яалаа. Арван жил ярьж байгаа V цахилгаан станц хаана байна.  Яагаад эдийн засгийн аюулгүй байдлаа баталгаажуулах ийм мега төслүүдийг хэрэгжүүлэхгүй байна вэ. Ерөнхий сайдын хичээж байгаа нефть боловсруулах үйлдвэрийн төсөл хэр амжилттай хэрэгжихийг бидний хэн ч бас хэлж мэдэхгүй байна. Эхлүүлсэн ч хэрэгжилгүй үлдсэн олон төслүүдийнхээ замаар орохгүйг хэн батлах юм.

Тэгвэл Оюутолгой төсөл бол өнөөдөр Монгол Улсын эдийн засгийн аюулгүй байдлын баталгаа болсон цорын ганц төсөл юм. Үүнийг яагаад хэн ч үнэнээр нь хэлж зориглохгүй байна вэ. Шүүмжлээд л байна. Тэр тусмаа улс төрийн зорилгоор энэ төсөл хэрэгжихэд ямар их саад хийж ирснийг үнэндээ эх орончоор харж чадахгүй явсаар ирлээ. Муу нэртэй С.Баяр, С.Баярцогт нарын 2009 онд байгуулсан оюутолгойн хөрөнгө оруулалтын гэрээний ач тусаар монголчууд их наяд гэдэг тоог үнэндээ ярьж сурсан гэдгийг мартах учиргүй юм. Улсын төсвийг эрх баригчид их наядаар ярьж чаддаг болсон, тэрбум тэрбум доллараар наймаа хийдэг болсон нь оюутолгой төслийн үр дүн гэдэгтэй маргах, үгүйсгэх нэгэн олдохгүй байх аа! Сүүлийн 10 жилд манай улсад оюутолгойгоос өөр бүтээн байгуулалт гээд нэрлэчих нэг ч төсөл алга.

Оюутолгой өнөөдөр манай улсын эдийн засгийн баталгаанаас гадна дэлхийн хүчирхэг гүрнүүдийн ашиг сонирхлыг монголд бий болгосон гэдгээрээ ямар их ач холбогдолтойг төсөөлөн хэлэх боломжгүй юм. Магадгүй бид дахиад Оюутолгой шиг том төсөл хэрэгжүүлэх нь юу л бол. Монголын эдийн засагт Оюутолгой хамгийн том, хамгийн нөлөөтэй тоглогч болж нэгэнт чадсан нь зөвхөн улстөрчид, эрх мэдэлтнүүдийн төдий биш бүх монголчуудын анхаарлыг хүссэн хүсээгүй татаж, бүгдэд хамааралтай болсон нь үнэн. Тогтворжуулсан татвар өдөр болгон төлж, ажлын 10 мянга гаруй байр бий болгон ердийн горимоороо ажиллаж байгаа үедээ ч Оюутолгой хамгийн их төсвийг бүрдүүлж байгааг бид мэддэг хэрнээ адлах ямар хэрэг байна аа!  Улстөрчид олонд танигдахын тулд Оюутолгойг оролддог нь хамгийн зөв арга мэт ч, хор уршиг нь манай улсын аюулгүй байдалд тулж ирэх болно гэдгийг тэд өөрсдөө сайн мэднэ. Гэвч нийтэд танигдаж, хувийн эрх ашиг нь хангагдаж байвал бусад асуудал даанч хамаагүй болсныг нь монголчууд ухаарч мэдэхээр цаг хугацаа өнгөрлөө. Дубайн гэрээ эх орны эрх ашгийн эсрэг болсон, Ч.Сайханбилэг урвасан гэдгийг энэ шүүмжилж шуугиж байгаа хүмүүс нотолж чадах юм уу, тэгээд! C.Баяр, С.Баярцогт нарын оронд өнөөгийн “эх оронч”, популист улстөрчид байсан бол авлига авахгүй байж чадах байсан юм уу, тэднээс илүү гэрээ хийж бас чадах байсан уу...? мэдээж Оюутолгой шиг том төсөл хэрэгжүүлэх туршлага монголчуудад байгаагүй. Хэн ч байсан алдаа гаргах байсан гэх магадлал илүү үнэмшилтэй сонсогдоно доо. Хийснээ тэгээд энэ олон жилд хэн нь сайжруулсан юм бэ. Улам л дордуулж, цаг хугацааг харамсалтайгаар үрж ирлээ шүү дээ. Дэлхийд томд орох ийм том төслийг хэрэгжүүлэхэд алдаа гаргахгүй гэвэл түүн шиг утопи санаа үгүй байх аа. Гэрээгээ цуцлах, зогсоох тухай тэнэг юм ярьж байхын оронд алдаагаа багасган чамбайруулах нь бидэнд өлзийтэй баймаар санагдана. Монголчууд бид бөөс хуурс, бэтэг тэмбүүнээсээ салах гэж хэдэн жилийг зарцуулсан гэдгээ ядаж бодмоор...Цаг хугацаа шаардах ийм том төсөл үр дүнгээ нэгэн цагт төгс өгдөг гэдгийг бид тэрхүү туршлагаасаа харж болно шүү дээ. Эцэст нь ажлын хэсгийг ахалсан  Д.Тэрбишдагва гишүүнд чин сэтгэлээсээ бид талархах ёстой юм. Нэгэн бодлын тэрбээр маш мундаг ухаан гаргаж Оюутолгой төслийн хөрөнгө оруулалтын гэрээг шалгасан тайлан, дүгнэлтээ ҮАБЗ-д өргөн барьсан байна. Яагаад гэвэл, Оюутолгой бол манай улсын эдийн засгийн аюулгүй байдлын хамгийн том баталгаа гэдгийг үндэсний аюулгүй Байдлын Зөвлөлөөр хэлэлцүүлэхээр болсон байна. Өнөөдөр бид улстөржиж, утга учиргүй попорсноор Монгол Улсынхаа гадаад худалдааны хамгийн том тоглогч, гол экспортлогч “Эрдэнэт үйлдвэр”ийг “алаад” хаяж байна. Энэ том үйлдвэрийг эрх баригчид дутуу алсан могой шиг болгож орхисон. Одоо Оюутолгойг хэрхэх нь тодорхойгүй байна. Яаж “алах”ыг нь харж байя. Аврах ч юм билүү хэн мэдлээ!

A

Жижиг

A

Дунд

A

Том

Валентины баярыг хэрхэн тэмдэглэх вэ

 0 сэтгэгдэл

Өнөөдөр бол Гэгээн Валентины өдөр. Вирусийн халдвар гарч, хөл хорио тогтоосон учраас хосууд энэ өдрийг гэртээ тэмдэглэх шаардлагатай болсон. Валентины баярыг гэрээс гарахгүйгээр хэрхэн романтик тэмдэглэж болох тухай сонирхолтой зөвлөгөө хүргэж байна. Ганц бие хүмүүсийг ч мартаагүй шүү.

Гэртээ романтик оройн зоог барих нь санхүүд хэмнэлттэй 

Энэ өдөр ресторануудын ширээ захиалга дүүрч, хосын өрөөний үнэ тэнгэрт хаддаг. Гэхдээ гэртээ сайхан ширээ засаж, хайртынхаа дуртай хоолыг өөрийн гараар хийж өгөх нь санхүүд хэмнэлттэйгээс гадна хосын харилцаанд эергээр нөлөөлөх болно. Дуртай хоолыг нь бэлтгэхээс гадна ширээгээ гоёмсог бүтээлгээр бүтээгээрэй. Эцэст нь чихэрлэг улаан дарс сонгож, лаа асаахаа мартуузай. 

Хайрыг харж чадахгүй ч киноноос мэдэрч болно

Бүх цаг үеийн хамгийн сонгодог сонголтод кино үзэх хувилбар заавал багтдаг. Энэ өдөр гэртээ гэрлэн чимэглэл асааж, дуртай амттанаа бэлтгээд хайрттайгаа хамт романтик кино үзээрэй. "Би түүнийгээ үргэлж санадаг. Хайр яг л салхи шиг, би харж чадахгүй ч мэдэрч чадна" гэж Walk to remember кинонд өгүүлдэг. 

Халуун ваннд хэвтэж, алжаалаа тайлаарай

Хамтдаа сарнайн дэлбээгээр дүүргэсэн халуун ваннд хэвтэж, алжаалаа тайлах нь баярын уур амьсгалыг мэдрүүлэх болно. Мөн лаа асааж илүү романтик орчин бүрдүүлээрэй.

Мөрөөдлийн жагсаалтаа шинэчил

Хосуудын харилцаанд ярилцах хамгийн чухал гэж сэтгэл зүйчид зөвлөдөг. Хайрттайгаа хамт хийж үзэх шинэ содон зүйлс, романтик аяллын төлөвлөгөөгөө боловсруулахад энэ өдөр хамгийн тохиромжтой. Баярт зарцуулах байсан төсвөө аяллын хуримтлалдаа нэмэрлэ. Үүний дараа бол зож байсан үеийнхээ захидал, цахим зурвасуудаа уншиж дурсамжаа сэргээгээрэй.

Ганц бие ч гэсэн гандан буурахгүй

Ганц бие байгаадаа гансарч, уйтгарлаж сууна уу. Цаг нь болоогүй учралын төлөө цагаасаа эрт шаналах хэрэггүй ээ. Таныг илүү олон учрал, гайхалтай дурлал хүлээж байгаа шүү.

Хэрхэн ганц бие байх вэ

Гал цогтой ганц бие уншигчдадаа How to be single киног санал болгоё. Таныг уйдаахгүй гэдэгт итгэлтэй байна.

Найзуудын үдэшлэг хийцгээе

Энэ өдрийг зөвхөн хостойгоо өнгөрүүлэх ёстой гэж үү. Удаан уулзаагүй найзуудтайгаа хамт бяцхан үдэшлэг хийвэл ямар вэ. Хамтдаа сонирхолтой тоглоом тоглож, амттай хоол идэж хөгжилдөх хэрэгтэй. Хоорондоо бэлэг солилцсон ч болно. Финландад хоёрдугаар сарын 14-ийг “Найзуудын өдөр” болгон тэмдэглэдэг аж.

Өөртөө бэлэг худалдан ав

Та өөрийгөө санхүүгийн ямар их хэмнэлттэй амьдардаг гэдгээ мэдэх үү. Хэрвээ хостой байсан бол хэн нэгэнд зориулах байсан тэр мөнгөө өөртөө зарцуулах хэрэгтэй. Массажинд орж, шинэ загварын хувцас, сонирхолтой ном гээд хүссэнээ худалдан ав. Сургалтад бүртгүүлсэн ч болох юм. 

Хүссэн зүйлээ хий 

Эцэст нь хэлэхэд энэ нийтлэлийг заавал хийх ёстой зүйлийн жагсаалт болгож битгий уншаарай. Таныг өөрөөс чинь илүү мэдэх нэгэн гэж үгүй. Тиймээс танд аз жаргал, сэтгэл ханамж бэлэглэдэг юу ч хийсэн болно.

A

Жижиг

A

Дунд

A

Том

Алекс Хайкенс: Хүүхдүүдийн хоол тэжээл, аюулгүй байдлыг мартаж болохгүй

 0 сэтгэгдэл
  • Сургууль, цэцэрлэг хаагдсантай холбогдуулан хүүхдийн аюулгүй байдал, хамгааллын асуудлыг мартаж болохгүй
  • Мөн өнөөгийн нөхцөл байдлаас үүдэлтэй санхүүгийн болон нийгэмд үзүүлж буй олон үр дагаврыг даван туулахад нь бага насны хүүхэдтэй айл өрхөд дэмжлэг үзүүлэх чиглэлээр нэмэлт ажлуудыг зохион байгуулах нь зүйтэй. Энэ ажлын хүрээнд бага насны хүүхэдтэй айл өрхөд учирч буй санхүүгийн дарамтыг бууруулахын тулд хүүхдэд нэмэлтээр бэлэн мөнгөний тусламж үзүүлэх санал зөвлөмжийг бид холбогдох талуудад хүргүүлсэн

НҮБ-ын Хүүхдийн Сангаас шинэ коронавирусээс урьдчилан сэргийлэх ажлын хүрээнд хүүхэд хамгааллын асуудалд анхаарч байна. Энэ талаар НҮБ-ын Хүүхдийн Сангийн Суурин төлөөлөгч Алекс Хайкенстэй ярилцлаа.

-Дэлхий дахинд шинэ коронавирусийн халдвар эрчимтэй тархаж байна. Энэ үед хүүхдийн асуудалд НҮБ-ын Хүүхдийн Сангаас хэрхэн анхаарч байна? 

-Шинэ коронавирусийн эсрэг Монгол Улсын Засгийн газраас авч хэрэгжүүлж буй арга хэмжээний хүрээнд хүүхдийн эрүүл мэнд, боловсрол, хамгаалал, хоол тэжээл, нийгмийн хамгаалал болон мэдээлэл харилцаа зэрэг чиглэлээр НҮБ-ын Хүүхдийн Сангаас дэмжлэг үзүүлэн ажиллаж байна. Ялангуяа цэцэрлэг, сургуулийн үйл ажиллагааг түр хугацаагаар зогсоосонтой холбогдуулан бага насны хүүхэд ажлын өдрүүдэд харах хүнгүй буюу эцэг эхийн хараа хяналтгүй гэртээ үлдэж байгаа. Хүүхдийн аюулгүй байдлыг хангах, болзошгүй эрсдлээс урьдчилан сэргийлэхэд хороо, сумдын хамтарсан багийг идэвхжүүлэх, цэцэрлэгийн болон бага ангийн хүүхэдтэй эцэг эхэд төрийн эсвэл хувийн хэвшлийн байгууллагад ажилладгаас үл хамааран ажлын цагийн уян хатан нөхцөлийг хэрэгжүүлэх шаардлагатай. 

-Хоол тэжээлйин дутагдлын талаар хийсэн судалгаа бий юу? 

-Сургууль, цэцэрлэгийн үдийн хоол нь тодорхой хэмжээнд дэм болдог байсан эмзэг болон ядуу өрхийн хүүхдийн хоол тэжээлийн асуудалд санаа зовниж, энэ асуудалд онцгойлон анхаарах тухай санал-зөвлөмжийг бид Шадар сайдад хүргүүлсэн. Мөн өнөөгийн нөхцөл байдлаас үүдэлтэй санхүүгийн болон нийгэмд үзүүлж буй олон үр дагаврыг даван туулахад нь бага насны хүүхэдтэй айл өрхөд дэмжлэг үзүүлэх чиглэлээр нэмэлт ажлуудыг зохион байгуулах нь зүйтэй. Энэ ажлын хүрээнд бага насны хүүхэдтэй айл өрхөд учирч буй санхүүгийн дарамтыг бууруулахын тулд хүүхдэд нэмэлтээр бэлэн мөнгөний тусламж үзүүлэх санал зөвлөмжийг бид холбогдох талуудад хүргүүлсэн. Цаашид үүсэж болох нөхцөл байдлыг хэд хэдэн хувилбараар тодорхойлж тохирсон хариу арга хэмжээг урьдчилан төлөвлөх үүднээс нийгэмд үзүүлэх үр нөлөөний түргэвчилсэн үнэлгээг мөн хамтран хийх саналыг хүргүүлсэн. 

-Хүүхдүүдэд теле хичээл зааж байгаа. Гэхдээ хүүхэд бүрт хүртээмжтэй байх эсэх нь эргэлзээтэй байна. Энэ талаар та ямар бодолтой байна вэ? 

-БСШУСЯ-тай хамтран телевизийн хичээлийг казах, тува хэлтэй хүүхдүүдэд эх хэл дээр нь хүргэхэд НҮБ-ын Хүүхдийн Сангаас дэмжлэг үзүүлж байгаа. Мөн эцэг, эхэд зориулан хүмүүжлийн эерэг арга болон зөв дадал хэвшилд хүүхдээ сургах тухай видео зөвлөмжийг орон даяар хүргэхээр бэлтгэлээ. Хүүхдүүдэд тусгайлан зориулсан эрүүл ахуйн зөвлөмж бүхий видео шторкуудыг бүтээж, телевиз, нийгмийн сүлжээгээр түгээх ажилд Эрүүл мэндийн яамтай хамтран ажиллаж байна. Гэр бүл, олон нийт, зорчин явагчдад зориулсан шинэ коронавирусийн халдвараас сэргийлэх тухай зөвлөмж бүхий зурагт болон мэдээллийн хуудсыг боловсруулан хэвлэх ажлыг НҮБ-ын Хүүхдийн Сангаас дэмжсэн. Эдгээрийг эрүүл мэндийн төвүүдээр дамжуулан иргэд олон нийтэд хүргэхээс гадна хилийн боомтоор орж, гарч буй зорчин явагчдад түгээнэ. Зөв, бодитой мэдээлэл, зөвлөмжийг олон нийтэд хүргэх нь нэн чухал. 

-Манай улс хамгаалалтын хувцас хэрэгсэл, амны хаалт дутагдалтай байгаа. Энэ зүйлээр хангахад Хүүхдийн Сан дэмжлэг үзүүлэх үү? 

-НҮБ-ын Хүүхдийн Сан одоогийн байдлаар Баянзүрх дүүрэг болон Баянхонгор аймагт эмнэлгийн халдвар хамгаалал, хяналтыг дэмжиж ажиллаж байна. Үүн дотроо хувийн хамгаалах хувцас хэрэглэл, амьсгалын замын өвчлөлд хэрэглэх эмнэлгийн нэн шаардлагатай тоног төхөөрөмжийн бэлэн байдлыг хангахад дэмжих болно. Цаашдаа энэ чиглэлээр хөрөнгө босгох ажлыг бид мөн хийж байгаа. 

-Коронавирусээс урьдчилан сэргийлэх талаар манай улсын авч хэрэгжүүлж буй арга хэмжээний талаар та юу хэлэх вэ. Учир дутагдалтай зүйл бий юу? 

-Монгол Улсын Засгийн газраас шинэ коронавирусийн тархалтаас урьдчилан сэргийлэх, хүн амыг хамгаалах чиглэлд шуурхай арга хэмжээ авч хэрэгжүүлж байгаад НҮБ-ын Хүүхдийн Сан талархаж байна. Ялангуяа эрүүл мэндийн салбар үүн дээр үр дүнтэй манлайлан ажиллаж байгаа нь сайн хэрэг. Гэвч сургууль, цэцэрлэг хаагдсантай холбогдуулан хүүхдийн аюулгүй байдал, хамгааллын асуудлыг мартаж болохгүй. Мөн одоо төлөвлөсний дагуу ирэх сарын 2-нд хичээл, ороод эхлэхэд цэцэрлэг, сургуулиудын бэлэн байдал нэн чухал. Халдваргүйжүүлэлтээ хэрхэн хийх вэ, хүүхдүүдийг хэрхэн хамгаалах вэ гээд бид одооноос бэлтгэж байх ёстой. Тиймээс НҮБ-ын Хүүхдийн Сан хүүхдийн эрүүл мэнд төдийгүй боловсрол, хамгааллын чиглэлд Засгийн газрыг дэмжин ажиллана.

A

Жижиг

A

Дунд

A

Том

Бяцхан иргэддээ санаа тавьцгаая

 0 сэтгэгдэл
  • Хотын багачууд гэртээ осолдож, галгүй хүйтэн гэрт дагжин чичирч, өлсөж, цангаж байна
  • Нэг ангид арав хүрэхгүй хүүхэд хүлээж авдаг бол нэг багш хоёр хүүхэд л хариуцах үүрэгтэй

Өглөө бүр “Ээж ээ баяртай, эрт ирээрэй” гэх захиас тээж, бяцхан гараараа хаалганы цаана даллаж хоцорсон охиндоо өдөржин сэтгэл зовоостой. Цэцэрлэгүүд үүдээ хааж, хөл хорио тогтоосон өдрүүдэд бага насны хүүхдүүд хараа хяналтгүй хэцүүдэж байна. Дэлхий дахиныг нөмөрсөн халдварт өвчний мэдээлэл өдөр бүр түгшүүр төрүүлж, хүмүүсийн анхаарал коронавирус дээр тогтож байхад, хотын багачууд гэртээ осолдох боллоо. Тэд галгүй хүйтэн гэрт дагжин чичирч, өлсөж, цангаж байгааг мартаж болохгүй. Бас айлд үлдсэн нэг нь хүчирхийлэлд өртөж байж ч магад. Зарим нь гэртээ цоожлуулж амиа алдлаа. Хүүхдээ хараа хяналтгүй, хайхрамжгүй хаядаг монголчуудад цэцэрлэг шиг хэрэгтэй зүйл алга. Цэцэрлэг бол жаалуудын аюулгүй байх газар нь, бас хамгаалалт нь юм гэдгийг хөл хорио тогтоосон өдрүүдэд эцэг, эхчүүд мэдэрч сууна. Тиймээс цэцэрлэгийн хүртээмжийг сайжруулахад төр, засаг анхаарал хандуулах хэрэгтэй бус уу. Бага насныхны дунд сугалаа явуулж, цэцэрлэгт оруулдаг гажиг тогтолцоогоо болих нь зүйтэй. Болж өгвөл бүх хүүхдийг цэцэрлэгт хамруулж, хараа хяналттай гэдэс цатгалан байлгамаар байна. НҮБ-ын Хүүхдийн сангаас бага насныхныг хоол тэжээлийн дутагдлаас хамгаалах анхааруулгыг төр засагт тавиад байгаа юм билээ. Нийгмийн багагүй хувь нь эмзэг, нэн ядуу бүлгийнхэн байдаг тул хүүхдүүд гэртээ хоол тэжээлийн дутагдалд ордог. Иймд хоол тэжээлийн дутагдалд оруулахгүйн тулд мөнгөн дэмжлэг үзүүлэх шаардлагатай гэсэн байр суурийг НҮБ-ын Хүүхдийн сан илэрхийлж буй. Хөгжингүй орнуудад хүүхэд хамгааллын асуудалд ихээхэн анхаарал хандуулдаг. Тэдэнд сард олгодог мөнгөн дэмжлэг ч хэрэгцээг нь хангахуйц байдгийг гадаадад амьдарч байгаад ирсэн хүмүүс ярьдаг. Гэхдээ сар бүр хүүхдийн мөнгийг хангалттай өгөхөө байг гэхэд цэцэрлэгт бүрэн хамруулмаар байна. Ингэж чадвал хүүхдүүд аюулгүй орчинд сурч хүмүүжих эрхээ эдэлнэ. Япон зэрэг өндөр хөгжилтэй оронд зургаан сартайгаас нь эхлээд авдаг цэцэрлэг байдаг. Сургуулийн өмнөх боловсролдоо ихээхэн анхаардаг аж. Нэг багшид оногдох хүүхдийн тоо ч харьцангуй бага. Нэг ангид арав хүрэхгүй хүүхэд хүлээж авдаг бол нэг багш хоёр хүүхэд л хариуцах үүрэгтэй. Энэ бол санаа авахуйц оновчтой шийдэл юм. Хүүхдийн хараа хяналт, хамгаалал хамгийн чухал асуудал. Багшийн ачаалал бага байх тусам хүүхдэд тавих хараа хяналт сайжирдаг нь өндөр хөгжилтэй орнуудын жишээнээс харагддаг. Хүн амаа олуулаа болгоё гэвэл хорвоод мэндэлсэн бяцхан зүрхнүүдээ хүн болгож авмаар байна. Хэнэггүй байдлаасаа болж тэднийг үхэл рүү түлхэх хэрэггүй. Үргэлж ажилтай хэмээн цаг наргүй зүтгэснээр бид юу хожиж байна вэ гэсэн асуултыг эцэг, эхчүүд өөрсдөөсөө нэг асууцгаая. Энэ орчлонд хүний амьдралын хамгийн нандин зүйл нь хүүхэд гэдгийг хэн хүнгүй мэддэг хэрнээ яагаад хараа хяналтгүй орхиод байна вэ. Хүүхдээс үнэ цэнтэй ажил, мөнгө энэ хорвоо дээр бий бил үү. Хүний амь малаас ч хямд тооцогдох гажиг тогтолцоотой нийгэмд бид амьдарч байна. Мал сүрийг төрийн хамгаалалтад байлгана гэж хуулиндаа заасан. Зуд болоход малд зориулсан өвс тэжээл нь бэлэн байдаг. Хууль нь хэрэгждэггүй, хариуцлагын тогтолцоо маш сул байдаг нь нууц биш. Тиймээс хүүхэд хамгааллын хуулиа эргэж нэг харахыг эрхэм түшээдэд сануулья. Ниргэсэн хойно нь хашгирдаг байдлаасаа салцгаая. Хүүхэд бол энэ улсын үнэт баялаг гэдгийг мартах ёсгүй. Бяцхан иргэддээ санаа тавьцгаая, эцэг, эхчүүд ээ!

A

Жижиг

A

Дунд

A

Том

Коронавирусийн халдвар “Токио 2020” олимпыг хойшлуулж болзошгүй

 0 сэтгэгдэл
  • Олимп үзэхээр төлөвлөсөн хүмүүс коронавирусийн улмаас цуцлах магадлал өндөр хэмээн USAToday таамаглажээ
  • Зарим тооцоогоор хаврын сүүл, зуны эхэн сарын үед халдварын дэгдэлт оргилдоо хүрэх таамаг бий. Хэрэв энэ тооцоо биеллээ олвол байдал олимп цуцлагдах аюул бодитоор нүүрлэнэ
  • Жуулчдын тоо бага, үзэгч цөөн байвал зохион байгуулагчид маш их алдагдал хүлээх болно

Зуны олимпын XXX-II наадам Японы нийслэл Токиод эхлэхэд таван сар үлдлээ. Гэвч Хятадад дэгдсэн коронавирусийн халдварын цар хүрээ улам тэлж, өвчлөгсөд болон нас барагсдын тоо огцом нэмэгдсээр байгаа нь олимпын наадамд нөлөөлж эхэллээ. Вирусийн халдвараас болж олимп хойшилж магадгүй гэсэн мэдээлэл тархсаны дараа Олимпын наадмыг зохион байгуулах комиссын гүйцэтгэх захирал Тоширо Муто мэдээлэл хийж, “Вирусийн халдвараас болж олимп хойшлох, цуцлагдах вий гэдгээс үнэхээр их санаа зовж байна” хэмээсэн бол маргааш нь “Олимпын наадам хуваарь ёсоор зохион байгуулагдана” гэсэн юм. 2016 онд зика вирусийн халдвар тархсаны дараа Риогийн олимпын зохион байгуулагчид иймэрхүү асуудалтай нүүр тулж байв. Гэхдээ коронавирус нь зикаг бодвол илүү аюултай, маш хурдтай тархаж байгаа нь байдлыг түвэгтэй болгож байна. Тиймээс Токиогийн олимпын зохион байгуулах хороо коронавирусийн эсрэг тэмцэх ажлын хэсэг байгуулжээ. “Бид халдварт өвчний тархалтыг анхааралтай ажиглаж, холбогдох байгууллагуудтай хамтран ажиллаж, олимпыг ямар нэг саадгүй зохион байгуулахын төлөө шаардлагатай бүх арга хэмжээг авах болно” хэмээн ажлын хэсгийн мэдээлэлд дурджээ. Түүнчлэн ОУОХ-ноос “Токио 2020 олимпын бэлтгэл ажил төлөвлөгөөний дагуу үргэлжилж байна” хэмээн мэдээлсэн юм. Хэдийгээр албаныхан ийн мэдэгдсэн ч вирусийн халдвар зохион байгуулагчдад багагүй саад учруулна хэмээн USAToday бичжээ. Олимпын наадамд 11 мянган тамирчин өрсөлдөх бол албаныхан, зочид төлөөлөгч, жуулчдыг нэмбэл олимп үргэлжлэх хоёр долоо хоногт 600 мянга орчим хүн Токиод зочлох тооцоо бий. Тэгвэл нэг дор цугларах энэ олон хүний аюлгүй байдлыг хэрхэн хангах нь зохион байгуулагчдын толгойны өвчин болжээ. Түүнчлэн олимпоор гадаадын жуулчдын тоог эрс нэмэгдүүлэх япончуудын төлөвлөгөөг коронавирус тасалдуулах нь нэгэнт ойлгомжтой болов. Тус улс энэ онд 40 сая орчим жуулчин хүлээн авах зорилт тавьсан. Гэвч Хятад улс вирусийн тархалтыг багасгахын тулд гадагш чиглэсэн жуулчны хөдөлгөөнийг хорьсон нь тэдний төлөвлөгөөнд бодит аюул учрууллаа. Япон улс 2019 онд Хятадаас 9.6 сая жуулчин хүлээж авсан нь нийт жуулчдын гуравны нэг болж байгаа юм. Түүнчлэн олимп үзэхээр төлөвлөсөн олон мянган хүн коронавирусийн улмаас төлөвлөгөөгөө цуцлах магадлал өндөр хэмээн USAToday таамаглажээ. Олимп хугацаандаа зохиогдлоо ч жуулчдын тоо бага, үзэгч цөөн байвал зохион байгуулагчид маш их алдагдал хүлээх болно. Грекчүүд 2004 оны олимп зохиогоод их хэмжээний алдагдалд орсон нь тус улсыг хямралд хүргэсэн жишээ бий. Грекийн гунигт түүх Японд давтагдах эрсдэл өндөр гэдгийг хэвлэлүүд анхааруулан бичих болжээ. Зарим тооцоогоор хаврын сүүл, зуны эхэн сарын үед коронавирусийн халдварын дэгдэлт оргилдоо хүрэх таамаг бий. Хэрвээ тооцоолсноор болбол олимп цуцлагдаж болзошгүй.