A

Жижиг

A

Дунд

A

Том
http://zgm.mn/post/1583/

Трамп, Ши нар цаашид тариф тогтоохгүй байхаар тохиролцов

Трамп, Ши нар цаашид тариф тогтоохгүй байхаар тохиролцов
 0 сэтгэгдэл

A

Жижиг

A

Дунд

A

Том
http://zgm.mn/post/1583/


АНУ-ын Ерөнхийлөгч Дональд Трамп, БНХАУ-ын дарга Ши Жиньпин нар дэлхийн гол хоёр эдийн засгийн хооронд дэгдсэн худалдааны дайныг дэвэргэхгүйн тулд цаашид шинээр тариф тогтоохоо түр зогсоохоор хэлэлцэн тохиролцов. Аргентинд чуулж буй их 20-ийн чуулганы үеэр бямба гарагт ноён Трамп, Ши нар хамт барьсан үдийн зоогийн дараа АНУ, БНХАУ-ын худалдааны дайн түр амсхийхээр болсон нь тодорхой болов. Хоёр улсын удирдагч шинээр тариф тогтоохоо зогсоож, худалдааны яриа хэлэлцээгээ эрчимжүүлэхээр тохиролцсоныг зоогоос хэдхэн цагийн дараа БНХАУ-ын гадаад хэргийн Сайд Ван-И Буэнос-Айрест сэтгүүлчдэд  мэдэгдлээ. БНХАУ-ын 200 тэрбум ам.долларын бараа бүтээгдэхүүнд оноосон 10 хувийн татварыг нэгдүгээр сараас 25 болгон өсгөхөө больж байгаагаа зарласан Цагаан ордон хоёр талын уулзалтыг “асар амжилттай” болсонд тооцов. Буултынхаа хариуд ноён Трамп оюуны өмчийн болон кибер хулгай, тарифын бус саад тотгор зэрэг хятадын худалдаатай холбоотой гол гомдлоо барагдуулах хүсэлтэй байгаа юм. 

Тохиролцооноос хойш 90 хоногт БНХАУ-ын тал бүтцийн шинэчлэл өрнүүлэхгүй бол АНУ тарифаа 25 хувь болгон өсгөнө хэмээн Цагаан ордны хэвлэлийн нарийн бичгийн дарга Сара Хакаби Сандерс мэдэгдлээ. БНХАУ мөн АНУ-тай хийдэг худалдаандаа тэнцвэр бариулахын тулд хөдөө аж ахуй, аж үйлдвэрийн бараа бүтээгдэхүүн ахиу худалдаж авахаар тохиролцсоныг нарийн бичгийн дарга өгүүлж байна. 

“АНУ, БНХАУ аль алинд нь хязгааргүй боломж бүрдүүлж буй бүтээлч, сайхан уулзалт боллоо. БНХАУ-ын дарга Ши-тэй хамтран ажиллах нь миний хувьд асар их нэр төрийн хэрэг” хэмээн ноён Трамп мэдэгдэв.

Хэдийнээ хохирол учруулчихаад байгаа худалдааны зөрчил шинэ хүйтэн дайн болон өргөжихөөс сэргийлэх ажилд бодитой ахиц гарах эсэхийг хөрөнгө оруулагч нар анхааралтай ажигласаар. Трампын төлөөлөгчид Буэнос-Айресээс Вашингтоныг зорихын өмнөхөн Цагаан ордны эдийн засгийн зөвлөх Ларри Кудлов сэтгүүлчдэд хандан уулзалт “маш сайн” болсныг товч өгүүлсэн юм. 

Уулзалт хоёр талын зарчмын ялгааг нэг мөр болгож чадаагүй ч аль алинд нь ялалтаа тунхаглахуйц үр дүнтэй болж өнгөрлөө. БНХАУ нэмэлт тарифыг түр хойшлуулж дөнгөсөн бол АНУ эдийн засгийн бүтцийн шинэчлэл илүү эрчимтэй өрнүүлэх шахалт Бээжинд тулгангаа хөдөө аж ахуйн бүтээгдэхүүнээ ахиу худалдахаар болов. 

“Талууд үнэмлэхүй шаардлагаа тулгаж чадаагүй энэ уулзалт хоёулаа ялалтаа тунхаглаж буй анхны тохиолдол биш. Аль аль нь байдлыг дордуулахаас зайлсхийсэн хэрэг” хэмээн Хадсоны хүрээлэнгийн ахлах судлаач Майкл Пилсбери тайлбарлав. Ноён Пилсбери нь Рональд Рейган, Жорж В.Бушийн засаг захиргааны үед батлан хамгаалахын дээд албанд ажиллаж байжээ. Хятадад шар буурцаг, аж үйлдвэрийн бараа бүтээгдэхүүн худалдаж авах хэрэгцээ шаардлага нь байгаа учраас импортынх нь бүтцэд нэмэлт хүндрэл үүсэхгүй хэмээн Bloomberg Enonomics-ын том орлик тайлбарлав.

Хоёр талын уулзалт төлөвлөж байснаас удаан буюу хоёр цаг гаруй үргэлжилсэн юм. Яриа хэлэлцээ хэвийнхээс удаан үргэлжилсэн нь цаашдын яриа хэлэлцээ үр дүнтэй болох найдвар төрүүлж буйг уг уулзалтад оролцоогүй ч бэлтгэл ажлыг нь гүйцэтгэсэн албаны хүн өгүүллээ. БНХАУ-д үзүүлж буй Вашингтоны шахалт нь цаашид дэлхийн худалдааны Байгууллагад шинэчлэл өрнүүлэх дохио хэмээн уг эрхэм нэмж анхаарууллаа.

A

Жижиг

A

Дунд

A

Том

“Зэвэрдэггүй” төмөр хатагтайн стиль одоо ч сонирхол татсаар

 0 сэтгэгдэл
  • Түүний гадаад төрхийн салшгүй хэсэг нь цүнх
  • Ерөнхий сайдын ойр тойрныхон түүний зүүсэн хавчаар, зүүлтээр хэлэлцээний үед бодол санаа, хандлагыг уншиж болдог хэмээн ярьдаг байв

Британийн Ерөнхий сайд асан Маргарет Тэтчерийг 2013 оны дөрөвдүгээр сарын наймны өглөө оршуулахад 2500 орчим өндөр хэмжээний зочид цугларсан. Уинстон Черчиллийн оршуулгаас хойш 48 жил Ерөнхий сайд нарыг сүүлчийн замд нь үдэхэд ирж байгаагүй хатан Элизабета II хүртэл иржээ. Оршуулга төрийн гэсэн статусгүй байсан хэдий ч ялгарах юмгүй байв. Сонирхолтой төмөр хатагтай өөрөө оршуулгынхаа дэгийг бичиж үлдээхдээ эрчүүд хар смокинг, эмэгтэйчүүд гашуудлын өнгөтэй өдрийн даашинз өмсөхийг хүссэн байв. Уг ёслолд Нэгдсэн вант улсын төсвөөс 10 сая фунт зарцуулсныг зарим хүн шүүмжилсэн. Тухайн үедээ үсээ дэгжин засуулж, нүүрээ энгийн будсаны дээр нарийн хийцтэй хослол өмссөн Британийн эмэгтэй Ерөнхий сайд өөгүй харагддаг байв. Түүний гадаад төрхийн салшгүй хэсэг нь цүнх. АНУ-ын Ерөнхийлөгч Рональд Рейган, ЗХУ-ын Ерөнхийлөгч Михайл Горбачёв нартай уулзахаар ирэхдээ барьсан Asprey брэндийн цүнх хожим нь дуудлага худалдаанд 28 мянган ам.доллараар зарагдсан. Ерөнхий сайд асны ойр тойрныхон нь хатагтайг дээдсийн уулзалт, арга хэмжээнд оролцохын өмнө хэдэн цагаар хувцсаа сонгодог байсныг дурссан нь бий. 1979 он хүртэл түүний үсний засалт жаахан эв хавгүй байсан бол Ерөнхий сайд болсноос хойш мэргэжлийн үсчдээс үйлчилгээ авдаг болов. Тэтчер “Ажлын өдөр дуустал үсний хэвээ хадгалахын тулд өдөртөө цаг хагас унтсан ч бэлэн” хэмээн хэлдэг байжээ. Тэрээр 1987 онд Михайл Горбачёв, гэргий Райса нартай хийх уулзалтад онцгой нарийн бэлдсэн гэдэг. Хоёр улсын иргэд айлчлалыг телевизээр ажиглах учир сайхан сэтгэгдэл төрүүлэх ёстой байв. Британийн танхимын тэргүүн Оросын соёлыг хүндэтгэж буйгаа илэрхийлэх үүднээс булган захтай бор кашемир пальто, том үнэгэн малгай сонгожээ. Дараа жил нь төмөр хатагтай сонгодог загварын жишээ болж, хамгийн ганган эрхэмсэг ихэс дээдсийн жаг саалтад бичигдсэн байна. Тэтчер өөрөө ийнхүү шагшигдсанаа амьдралын хамгийн баяр баясгалантай мөчийн нэг хэмээн дурсжээ. Засгийн газрыг тэргүүлэхийн сацуу тэрээр загвар зохион бүтээгчдийг ивээн тэтгэж, загварын бизнест туслахыг хичээдэг байв. Тэрбээр улстөрчид нь байнга цэмцгэр дэгжин хувцаслаж буй Францыг жишээ болгон ярьдаг байсан гэдэг. Хатагтай Тэтчерийн ерөнхий стилист асан Маргарет Кинг “Костюм зураг дээр үргэлж сайхан гардаг” хэмээн ерөнхий сайдыг юбка, пиджакны хослол өмсөхийг ятгаж чадсан аж. Ерөнхий сайд чинээлэг бус гэр бүлд өссөн боловч ээж нь оёдолчин байсан тул загварлаг чанартай хувцас, гоёлоор дутаадаггүй байсан юм. Тэрээр ёсорхуу хослолоос төрөх хатуу дүр төрхийг зөөллөхийн тулд цамцан дээрээ тууз, хавчаар зүүнэ. Түүний мод, цэцэг, шавжийн дүрстэй хавчаар зүүлтийн том цуглуулга бий. Дизайнерууд Британийн Ерөнхий сайдад үйлчилгээ үзүүлэхээр өрсөлдөнө. Chanel брэнд цагаан алтаар урласан цэцгэн хэлбэртэй зүүлтээ Тэтчер хэмээн нэрлэжээ. Ерөнхий сайдын ойр тойрныхон түүний зүүсэн хавчаар, зүүлтээр хэлэлцээний үед бодол санаа, хандлагыг уншиж болдог хэмээн ярьдаг байв. Ерөнхий сайд үнэт эдлэлд маш дуртай байсан тул олон зүйлийг зэрэг зүүхээс татгалздаггүй байсан гэдэг. Стилист нэг удаа гоёл чимэглэлдээ даруухан байхыг зөвлөж, сувдан зүүлтээ тайлахыг сануулахад “Ихрүүд төрөхөд нөхөр маань бэлэглэсэн юм” гээд хүзүүндээ үлдээжээ. Ерөнхий сайдын дуртай өнгө нь хөх. Цэнхрээс эхлээд бараан хөх хүртэл олон төрлөөр хийсэн ийм өнгийн хослол өмссөн нь олонтоо харагддаг. Энэ нь Консерватив намын өнгө учраас улс төрийн сурталчилгааны зорилго агуулсан бололтой. Нэг арга хэмжээн дээр Тэтчер хатан хаантай тун төстэй хувцастай ирсэн учир хувцсаа өмнөөс тохирч байхыг санал болгоход Елизабета II татгалзжээ. Төмөр хатагтай олонх эмэгтэй адилаар хувцаслалтад анхаардгаа хүлээн зөвшөөрөөд дурсамж номдоо “Хамгийн гол нь улс төрийн өнцгөөс зөв сэтгэгдэл төрүүлэхийн тулд яаж хувцаслах нь чухал” хэмээн бичжээ.

A

Жижиг

A

Дунд

A

Том

Европын Холбоо авто үйлдвэрлэгчдэд илүү хатуу шаардлага тавина

 0 сэтгэгдэл
  • Шинэ­ зохицуулалтыг­ зөрчигчид ­32­ тэрбум­ хүртэлх­ еврогийн­ торгууль­ оноохоор заасан­ нь­ авто­ үйлдвэрлэгч­дийн­ боломжит­ орлогоос­ хоёр­ дахин­ их­ байгаа­ юм

Ирэх оны нэгдүгээр сарын 1-нээс авто машин үйлдвэрлэгч компаниуд Европын Холбооны хэмжээнд экологийн шинэ журам мөрдөж эхэлнэ. Шинэ журмаар тус холбооны зах зээлд худалдаалах бүх автомашин нэг километр зайд ялгаруулах нүүрстөрөгчийн давхар ислийн ялгарал 95 граммаас хэтрэх ёсгүй. Шинэ зохицуулалтыг зөрчигчид 32 тэрбум хүртэлх еврогийн торгууль оноохоор заасан нь авто үйлдвэрлэгчдийн боломжит орлогоос хоёр дахин их байгаа юм. Автомашинаас ялгарах бохир ялгаралд тавьж буй хатуу хязгаарлалт нь цахилгаан хөдөлгүүрт шилжих шилжилтийг хурдасгаж, шинэ технологи хөгжүүлэхэд түлхэц болно. Нэн шинэ технологид оруулах хөрөнгө оруулалт ихсэхээр Европ тивд автомашин үйлдвэрлэлийн салбар зардлаа танаж, ажиллах хүчнээ цомхотгох шаардлага тулгарлаа. Аudi компани ирэх таван жилд 9500 ажилтан цомхотгох замаар цахилгаан автомашин, дижитал технологид зургаан тэрбум еврогийн хөрөнгө оруулахаар төлөвлөжээ. Тус тивийн улсууд цахилгаан хөдөлгүүрт машин худалдан авагчдыг дэмжих бодлогоо эрчимжүүлж буйн нэг жишээ нь ХБНГУ болж байна. Ирэх оноос тус улсын цахилгаан машин худалдан авагчдад олгох нөхөн олговрыг хоёр дахин өсгөнө. Гэхдээ Европ тивийн цахилгаан автомашины тоо өнөөгийн экологийн үр дагаврыг нөхөж чадах хэмжээнд хүрэхээргүй бага хэвээр. 2025 он гэхэд тус тивийн цахил гаан хөдөлгүүрт авто машин нийт автомашины дөнгөж 10.2 хувьд, дахиад таван жилийн дараа 20 хувьд хүрэх төлөвтэй байна.

A

Жижиг

A

Дунд

A

Том

Хятадын дижитал юань хэрэглээнд гарах дөхсөөр

 0 сэтгэгдэл



Хятадын онлайн төлбөрийн үйлдвэрлэлд ноёрхогч дижитал санхүүгийн эзэнт гүрэн байгуулсан Жэк Ма, Пони Ма нарт нэгэн хүчирхэг өрсөлдөгч заналхийлэх болсон нь БНХАУ-ын төв банк юм. Юанийн цахим хувилбар удахгүй гаргах төлөвлөгөөтэй хятадын Ардын банк нь үндэсний дижитал валют бүхий дэлхийн анхны гол төв банк болж болзошгүй. Энэхүү төлөвлөгөө хэрэгжих аваас 27 их наяд ам.доллараар хэмжигддэг хятадын онлайн төлбөрийн зах зээлд Ant Financial-ын Alipay, Ten cent holdings Ltd-гийн WeChat Pay-г тулаанд дуудсан хэрэг болно. Ухаалаг утсанд суурилсан цахим төлбөр хятадад хаа сайгүй нийтлэг. Автобусанд суухаас авхуулаад дөхөм дэлгүүрээр үйлчлүүлэх, хүнсний захаас ногоо авах хүртэлх төлбөр тооцооны 94 хувийг хоёрхон компани гартаа атгадаг. Ши жиньпиний удирдлага доорх хятад улсын амин чухал үйлдвэрлэлд хувийн салбар ноёлох нь ховор үзэгдэл бөгөөд цаашид технологийн аваргуудад хүнд цаг үе тулгарч тун болзошгүй. Төв банкны дэмжлэгтэй дижитал түрийвч хэрэглээнд нэвтрэх нь Ant, Tencent хоёрын бизнесийн цохилох зүрх болсон төлбөрийн үйлчилгээнд ноцтой хохирол учруулах аюултай. “Хувийн компаниуд улс орны санхүүгийн тогтолцооны үндэс төлбөрийн салбарт ноёрхохыг зүгээр хараад сууж болохгүй учраас төв банк алдагдсан эрх мэдлээ эргүүлэн авах гэж буй хэрэг” хэмээн Шанхайд төвтэй санхүүгийн судалгааны Wisburg фирмийг үндэслэгч Жу Чэнь тайлбарлав. Хятадын Ардын банк тус улсын төлбөрийн бизнесийн гуравны нэгийг гартаа оруулж чадна хэмээн үздэг тэрбээр “WeChat, Alipay томоохон цохилтод өртөх аюултай”-г анхаарууллаа. Дижитал юань одоогийн бизнест хэр аюул учруулах, хятадын хэрэглэгч нар шинэ төлбөрийн хэрэгслийг хүлээн авах уу, аль эсвэл албан шаардлагаар нэвтрүүлэх үү гэдэг нь одоогоор тодорхойгүй. Дижитал юаньтай холбогдуулан дээрх хоёр хувийн компанийн удирдлага нийтэд ил тод тайлбар хэлээгүй ч Ant Financial зохицуулах байгууллагатай уг асуудлаар хамтран ажиллаж байна. Эрх баригч албаны хүмүүсийн ярианаас үзвэл хятадын Ардын банк ч дижитал юань гаргах нарийвчилсан тов, төлөвлөгөөгөө танилцуулаагүй байгаа. Хэрэглэгч, бизнесийнхэн ухаалаг утсандаа дижитал түрийвч татан суулгаж, ATM-ээр үйлчлүүлдэгтэй нэгэн адилаар арилжааны банканд нээлгэсэн данснаасаа токен авч байх юм. Авсан токеноо бэлэн мөнгөний адилаар төлбөр тооцоонд ашиглаж явна. Энэ тогтолцоо нь банкны данснаас дебет, кредит картын хэлбэрээр гүйлгээ боловсруулдаг одоогийн мобайл төлбөрийн функцээс нэлээн ялгаатай. Гэхдээ төрийн токен хэрэглээ болж чадах тохиолдолд хятадын зохицуулах байгууллагууд улс орныхоо мөнгөний нийлүүлэлтийг одоогийнхоос илүү хянах боломж бүрдэнэ. Өргөн хэрэглээний бараа бүтээгдэхүүний мобайл төлбөр нь БНХАУ-ын дотоодын нийт бүтээгдэхүүний 16 хувь болдог. Тэгвэл кредит картын төлбөр нийтлэг АНУ, Их Британид уг үзүүлэлт нэг хувь ч хүрдэггүй. БНХАУ хэрэг дээрээ бэлэн мөнгө хэрэглэдэггүй улс болж хувирсаар байгаатай уялдан эрх баригчид улс орны санхүүгийн слесарийн үүрэг гүйцэтгэгч компаниудыг анхаарч эхэллээ. “Технологийн эдгээр аварга компани биднийг өрсөлдөөнд уриалан дуудахын зэрэгцээ санхүүгийн эрсдэлд түлхэж байна” хэмээн БНХАУ-ын төв банкны тэргүүн И-Ган энэ оны эхээр хэвлэлийн хурал дээр тайлбарлаж байв. “Энэ өрсөлдөөнд ялагч бүгдийг хүртэн монопол болж байгаа болохоор эрсдэл мөн” гэж тэрбээр хэлсэн юм. Зарим улс тодорхой зорилготойгоор дижитал нэвтрүүлэх гэж байгаа бол үлдсэн хэсэг нь харзнах бодлого баримталж байна. Хятадын зохицуулах байгууллагууд төлбөр тооцоог стратегийн амин чухал ач холбогдолтойд тооцож байгаа л бол зах зээлийн ядаж гуравны нэгийг хяналтдаа авч таарна хэмээн жу өгүүлж байлаа. Нийт хэрэглэгчийг хамарсан төлбөрийн функцтэй байхын чухлыг ойлгосон Tencent, Alipay хоёр зах зээлд ялагч болохын төлөө уг салбарт олон тэрбум ам.долларын хөрөнгө оруулах сонирхолтой. Нийтээр хэрэглэж заншсан одоогийн хүчирхэг тогтолцоог өөрчлөх нь амар ажил биш. Хятад хэрэглэгч банкны картаа аппликэйшнтэй холбож өдөр тутмын төлбөр тооцоо хийхэд ашигласаар олон жил болсон. Alipay, WeChat Pay нь БНХАУ-д тус бүрдээ 900 сая гаруй идэвхтэй хэрэглэгчтэй. Мөнгө угаах явдалтай тэмцэх хүрээнд бэлэн мөнгийг дижитал токеноор орлуулах нь ажил хэргийн харьцангуй хялбар тал. Хүнд тал нь болох төлбөр тооцооны зах зээлээс өөрийн гэсэн хувиа эргүүлэн авахын тулд худалдаачид дижитал токентой шууд харьцах өөрийн гэсэн сүлжээ үүсгэх хэрэг гарна. Үүний тулд асар их ажил хийх шаардлагатайг River Pay компанийг үндэслэгч Райан Жэн тайлбарласан юм. River-Pay нь Alipay, WeChat Pay-г худалдаачидтай холбож өгөхөд туслах ажил эрхэлдэг. 









A

Жижиг

A

Дунд

A

Том

Японы эзэн хааны ёслол ертөнцийн язгууртнуудыг цуглуулав

 0 сэтгэгдэл


- Ерөнхий сайдынх нэг үдэш ₮1.6 саяын хоол зооглов

Япон улсын шинэ Эзэн хаан сэнтийдээ заларсныг тунхаглах ёслолд Монголын төрийг төлөөлж оролцсон Ерөнхий сайд У.Хүрэлсүхийг гадаадын зарим хэвлэлд Ерөнхийлөгч Х.Баттулгатай андуурч нийтэлсэн тухай мэдээг сошиал орчин ид “мэрж” байна. Үүнтэй зэрэгцээд “Ерөнхий сайдын гэр бүл нэгэн үдэш сая гаруй төгрөгийн хоол зоогложээ” гэсэн мэдээлэл түгэх болов. Рэйвагийн он тоолол эхэлж буй ёслолыг тус улсын Ерөнхий сайд Абэ гардан зохион байгуулсан бөгөөд хүндэтгэлийн хүлээн авалтын зоогийг гадаад, дотоодын зочдод ялгавартай байдлаар бэлдэх санал гаргасан гэнэ. Ялангуяа гадаад зочдод зориулсан нэг хүний зоогт өндөр ач холбогдол өгч, үнэтэй бүхнээ харамгүй зарцуулсан гэж Японы хэвлэлүүд онцолж байна. Тэндхийн хэвлэлд бичсэнээр гадаад зочны нэг хүний зоог нь 32.4 мянган иен буюу 800 мянган төгрөгийн өртөгтэй аж. Манай Ерөнхий сайд гэргийн хамт 1.6 сая төгрөгийн үнэтэй хоолыг нэгэн үдэш зооглосон зочдын тоонд ч оржээ. Мөн манай Ерөнхий сайд ёслолын арга хэмжээний үеэр БНСУ-ын Ерөнхий сайдтай “буу халж”, англи хэлнийхээ чадварыг харуулж буй зургийг Японы хэвлэлүүд ёслолын эргэн тойрны сонин хачин болгон толилуулжээ.