A

Жижиг

A

Дунд

A

Том
http://zgm.mn/post/764/

Ухаалаг автомашины эрэлт нэмэгдэх нь Монголд ашигтай

​Цахилгаан автомашины үйлдвэрлэл зэсийн эрэлтийг нэмэгдүүлнэ​

 0 сэтгэгдэл

A

Жижиг

A

Дунд

A

Том
http://zgm.mn/post/764/

Цахилгаан автомашины одоогийн нөхцөл байдал, ирээдүйн хандлага, боломжийн талаар цувралаар хүргэж буй. Өмнө нь дурдсанчлан цахилгаан автомашины үйлдвэрлэлийн дийлэнх зардлыг батерейд зарцуулдаг. Сүүлийн үеийн ухаалаг утас, цахилгаан автомашины батерейн хамгийн гол түүхий эд нь литийн давс, кобальт, бал чулуу, никель, манган, хөнгөн цагаан юм. Үүнээс кобальт хамгийн шилдэг нь. Энэ түүхий эдээр хийсэн батерей нягтрал ихтэй, цэнэгээ удаан барьдаг. Одоо зах зээлд борлуулалт сайтай байдаг Nissan Leaf-ийн батерейн гол орц манган. Гэвч кобальтын батерейтэй нь чанараараа үүнтэй харьцуулашгүй сайн эд. Харамсалтай нь дэлхий дээр кобальтын нөөц харьцангуй бага. гэвч эрэлт их, тиймээс бусад түүхий эдээс өндөр үнэтэй. Иймд батерей үйлдвэрлэгчид зардлаа танах үүднээс кобальтыг орлох арга замыг эрэлхийлж байна. Харин Монгол орны хувьд одоогоор тогтоогдсон кобальтын нөөц байхгүй ч, батерей үйлдвэрлэлийн хоёр дахь чухал түүхий эд болох литийн нөөц бүхий гурван орд Дундговь, Дорноговь, Сүхбаатар аймагт тогтоогджээ.


• Хөх дэлийн ордын баттай зэрэглэлээр тогтоогдсон литийн нөөц нь 0.145 хувийн дундаж агуулгатай 37.7 мянган тонн. Уг ордын эзэмшигч нь “Алкалли металл монголиа” ХХК.

• Мөнхтийн Цагаан дөрвөлжингийн орд нь 0.65 хувийн дундаж агуулгатай 14575 тонн нөөцтэй. Эзэмшигч компани нь “Литиум майнинг” ХХК.

• Сүхбаатар аймагт илэрсэн литийн үндсэн чулуу ордыг “Оюуны ундраа” групп ашиглалтад оруулахаар ажиллаж байна. Уг орд хангалттай хэмжээний литий карбонатын нөөцтэй болохыг тус компани өмнө нь мэдээлж байжээ. Дэлхийн литийн хэрэглээний 39 хувийг батерей, 30 хувийг керамик болон шилний үйлдвэрлэл эзэлдэг. Литийг ялгах технологи нь газрын ховор бусад элемент шиг ярвигтай биш. Түүнчлэн манай орны хувьд хэт суурилаг чулуулагтай холбоотойгоор цаашид ордууд нээгдэх ихээхэн боломжтой талаар мэргэжилтнүүд онцолжээ.

Литийн эрсдэл

Сүүлийн жилүүдэд литийн нийлүүлэлт сул байснаас үнэ хөөсрөлтэй байгаа. Өндөр үнэ болон цахилгаан автомашины зах зээлийн тэлэлтээс шалтгаалж шинэ, хуучин уурхайнууд үйлдвэрлэлээ нэмэгдүүлж буйг Bloomberg-ийн шинжээчид онцолжээ. Гэвч литийн үнэ одоогийн түвшнээс уруудвал шинээр уурхайнууд төдийлэн ашигтай ажиллаж чадахгүй. Энэ нь цахилгаан автомашины үйлдвэрлэлд ч нөлөөлж тун магадгүй.

Монголд литийн нөөц бүхий гурван орд тогтоогдсон

Цахилгаан автомашины 2030 оны зорилтот үйлдвэрлэлд хүрэхийн тулд литийн эрэлтийг хангах шинэ хөрөнгө оруулалтууд шаардлагатай болно. Шинжээчдийн харж буйгаар цахилгаан автомашин үйлдвэрлэл ойрын хугацаанд төлөвлөсөн хүчин чадлынхаа хагаст хүрлээ гэхэд ирэх таван жилд литийн эрэлтийг хангаад байх боломжтой. Гэхдээ цаашдаа зах зээлд хомсдол үүснэ гэх болгоомжлол бий. Харин үүнтэй зэрэгцэн кобальтыг орлох технологи хурдацтай хөгжвөл 2030 он хүртэл литийн эрэлт буурах хандлага бас ажиглагдаж байна. Bloomberg New Energy Finance судалгаанаас харахад эрсдэлийг тооцохгүйгээр 2022 он гэхэд дэлхийн кобальтын нийт нийлүүлэлт 154 мянган тоннд хүрэх аж. Гэхдээ одоогийн тогтоогдсон нццу нэмэгдвэл шүү дээ. Хэрэв байдал сайнгүй болвол цахилгаан автомашин үйлдвэрлэгчид кобальтын хэрэгцээг бууруулах шийдэл эрэлхийлэх болно. Мөн дахин боловсруулах бас нэг хувилбар ч байж болох юм. Судалгаанаас харахад жилд 100 мянган тонн кобальтыг дахин боловсруулбал 2030 он хүртэл нийлүүлэлтийн муруй тогтвортой байх найдвар бий. Гэсэн хэдий ч одоогийн байдлаар дахин боловсруулсан литий-ион батерейн чанар хэрэглээнд хангалттай сайн байж чадахгүй байна.

Бусад түүхий эдийн эрэлт ба монголд үзүүлэх нөлөө

Литий, кобальтаас гадна цахилгаан автомашины эрэлтэд нийцүүлэхийн тулд бусад түүхий эдийн нийлүүлэлтийг дэмжихэд ихээхэн хөрөнгө оруулалт шаардагдах төлөвтэй. Жишээ нь, 2030 он хүртэл уг салбарт дунджаар хоёр сая тонн зэс шаардлагатай талаар Bloomberg-ийн шинжээчид онцолж байна. Зэсийн экспортоос хараат Монгол улсын хувьд энэ нь маш сайн дохио. Манай өмнөд хөрш дэлхийн цахилгаан автомашины үйлдвэрлэлийн талаас илүүг нь дангаараа нийлүүлдэг. БНХАУ-ын зэсийн хэрэглээ энэ онд дунджаар 23 сая тонн байх төлөвтэй байна. Үүгээр ч зогсохгүй литийн ханш Хятадад харьцангуй өндөр. Энэ нь хэдийгээр Монголын литийн ордуудын нөөц төдийлэн өндөр биш ч гэсэн дэлхийн маш хязгаарлагдмал нөөцтэй харьцуулахад бидний хувьд чамлахааргүй боломж юм.

A

Жижиг

A

Дунд

A

Том

Apple хамгийн үнэтэй iPhone-оо танилцуулав

 0 сэтгэгдэл

Apple компани хамгийн үнэтэй iPhone-аа эрүүл мэндийн тусгай функц бүхий шинэ, илүү үнэтэй Watch-ын хамт танилцуулсан. Энэ нь манлай загваруудад тулгуурлаж орлогоо өсгөх арга эрэлхийлсээр байгаагийн илрэл болов. Лхагва гарагт Apple гурван шинэ ухаалаг утас сонирхуулсны нэг нь тус компанийн хамгийн үнэтэй iPhone болж буй XS Max загвар. Энэхүү загвар 6.5 инчийн дэлгэцтэй нь iPhone-ууд дотроо хамгийн томд тооцогдоно. Хуучин 5.8 инчийн дэлгэцтэй iPhone X-ийн шинэчилсэн хувилбар iPhone XS загварыг өмнөхтэй нь ижил буюу 999 ам.доллараар үнэлжээ. Гарахаас нь өмнө шинжээчид уг загварын үнэ хямдарна гэж таамаглаж байсан юм. XS-ийнх шиг ган бус хөнгөн цагаан их биетэй, 6.1 инчийн LCD дэлгэц бүхий шинэ iPhone XR загвар мөн гарлаа. ХR-ийн гарааны үнэ 749 ам.доллар. Гүйцэтгэх захирал Тим Кук “бүр олон хүний ухаалаг утасны ирээдүйг тодорхойлно” хэмээн онцолсон уг утасны гарааны үнэ 749 ам.доллар. Энэ нь жилийн өмнө гарсан түвшний iPhone 8-аас даруй 50 ам.доллараар үнэтэй байна. “Шинэ iPhone XR нь илүү үнэтэй ХS-тэй харьцуулахад хямд үнээр том дэлгэцтэй утас авах боломж гэсэн үг.

Өргөн хэрэглээний цахим бүтээгдэхүүний үнэ тогтооох тал дээр Apple тогтсон дүрмийг эвдсээр ирлээ” хэмээн CCS Insight-ын шинжээч Жефф Блэйбер тайлбарлав. Харин хоёр жилээр хуучирсан iPhone 7-г 449, iPhone 8-ыг 599 ам.доллараар үнэлсэн нь тус бүр жилийн өмнөх үеэсээ 100 ам.доллараар хямдарсан гэсэн үг. Apple “бусад үйлдвэрлэгчдийн өрсөлдөх загвар гарах тэр мөч хүртэл борлуулалт өссөөр байх хангалттай сайн ухаалаг утаснууд гаргаж чадсан” хэмээн Moor Insights & Strategy-гийн шинжээч Патрик Мурхед үзэж байна. Купертиногийн компани iPhone-уудын зэрэгцээ Apple Watch-ын шинэ загвар сонирхуулсан нь мөн л хуучнаасаа үнэтэй болжээ. Үүрэн холбоонд холбогддог Series 4 загварын гарааны үнийг 499 ам.доллараар тогтоосон. Энэ нь жилийн өмнө гарсан өмнөх загварынхаас даруй 100 гаруй ам.доллараар илүү байгаа юм. Бугуйн цаганд АНУ-ын зохицуулах байгууллагуудын зөвшөөрөл бүхий, фитнессийн гэхээсээ анагаах ухааны талдаа зориулалттай зүрхний хэм мэдрэгч сенсор суулгасан байна. Энэ удаагийн өсөлт нь жилийн өмнө бүтээгдэхүүний борлуулалт буурсан ч орлого өссөн Apple-ын стратеги үргэлжилсээр байгааг нотлов.

Үнийн өсөлтийг зөвтгөхийн тулд Apple компани iPhone XS-дээ шинэ A12 Bionic чип, хос SIM картны дэмжлэг, их биеийн алтадмал өнгөлгөө ашиглах зэргээр шинэ технологи ахиу оруулжээ. А12 Bionic нь зах зээлд нэвтэрч буй долоон нанометрийн анхны чип тул Apple хагас дамжуулагчийн салбарт Intel зэрэг өрсөлдөгчөө гүйцсэн хэрэг боллоо. Царай таних ажиллагааг илүү шуурхай гүйцэтгэж, ерөнхий бүтээмж өссөн шинэ үеийн чип нь iPhone-ын камераар авсан фото зургийн чанарыг ч сайжруулж өгнө. Ухаалаг утасны дүрсний сенсор ч чанарын хувьд шат ахижээ. арай хямд iPhone XR ч шинэ A12 чип, хос SIM дэмжлэгтэй. Уг загварт хөнгөн цагаан их бие, арын камерын ганц линз, LCD дэлгэц ашигласан тул манлай XS-ээс хямд болж байна. Хос SIM картны дэмжлэг нь нэг утсаар зэрэг хоёр дугаар ашиглах, дуудлага хийх боломжийг хэрэглэгчид олгоно. Тус компани урьд нь зөвхөн iPad, Apple Watch-д ашигладаг байсан ESIM буюу нэгтгэмэл SIM картыг анх удаа iPhone-д нэвтрүүллээ. AT&T, Verizon, Vodafone, EE, Deutsche Telekom зэрэг олон мобайл оператор E-SIM дэмжих юм. Гэхдээ Apple компани бодитой хос SIM слот бүхий тусгай загварыг үүрэн холбооны операторуудын зохицуулалт илүү түвэгтэй Хятад улсад зориулж үйлдвэрлэдэг.

A

Жижиг

A

Дунд

A

Том

Бүтээмжээ өсгөе гэвэл технологиос гар бүү тат

Технологийг хөдөлмөрийн бүтээмж болгох нь хөгжиж буй орнуудад илүү ашиг тустай

 0 сэтгэгдэл

Дэлхий дахинд даяаршлын шинэ хандлага ажиглагдаж эхэллээ. Мэдээлэл, технологийн хурдацтай хөгжлийн нөлөөгөөр шинэ дэвшилтэт технологи дэлхийн өнцөг булан бүрт тархах болсон. Жишээ нь, нийтэд дэлгэгдэж буй iPhone гар утасны шинэ загварыг нээлтээ хийсэн даруйд нь Монголын жирийн нэгэн иргэн хэрэглэж байвал бид гайхахгүй болсон цаг үе. Энэ мэтчилэн улс орнууд мэдлэг, технологийг маш түргэн хуваалцах болжээ. Тэгвэл үүнийг дагаад ажиглагдаж буй томоохон зүйл нь хөдөлмөрийн бүтээмж юм. Дэлхийн шилдэг зохион бүтээгчдийн бүтээлийг улс орон хэрхэн нутагшуулж, өргөн хэрэглээ болгож буйг тодорхойлох зорилгоор Олон улсын валютын сан “Даяарчлал бүтээмжийн өсөлтөд нөлөөлсөн үү” судалгааг гаргасан байна. Уг судалгаанд мэдлэг боловсрол хэрхэн бүс нутаг дамжин тархаж буйг долоо хоногийн графикаар харуулжээ. Графикаас харахад АНУ, Европ, Япон улс дэлхийн патентын баримтаар 1995 онд тэргүүлж байсан бол өдгөө БНХАУ дэлхийн бусад бүх орныг нийлүүлсэнтэй тэнцэхүйц олон патенттай болсон байна. Хятадын патентын баталгаа хурдацтай өсөх болсон гол шалтгаан нь тус улс төсөв болон бусад урамшууллаар патентын зардлыг бууруулж чаджээ.


Нөгөөтэйгүүр, Хятадын худалдааны сүлжээнд нэгдэж буй Азийн улс орнуудад даяаршил хамгийн ашигтай байгааг дурдаад, бусад бүс нутаг дэлхийн худалдаанд хараахан нэгдэж чадахгүй байгааг онцолсон байна. Сүүлийн 20 гаруй жилд дан ганц хувцас, хэрэглэл гэлтгүй цахилгаан болон тээврийн тоног төхөөрөмж гэх мэт инновацийн эрчимтэй үйлдвэрлэлээр Хятад тэргүүлж эхэллээ. Түүнчлэн сүүлийн жилүүдэд Хятад, Солонгос патентын ач холбогдлоор хэмжигддэг дэлхий нийтийн мэдлэгийг улам их ашиглах болсон ба үүнийгээ дагаад ажлын бүтээмж нь хурдацтай өсөж байна. шинэ технологи зохион бүтээх боломж, бололцоо сулхан манай орны хувьд өрсөлдөх чадвараа ахиулахын тулд ажлын бүтээмжээ сайжруулах шаардлагатайг мэргэжилтнүүд онцлох болсон. Тэгвэл Хятадын жишгээр гаднын боловсролыг нутагшуулж, энэ салбарт хөрөнгө оруулалт татах замаар Монгол Улс ч мөн адил бүтээмжээ дээшлүүлэх боломжтойг үгүйсгэх аргагүй. Түүнчлэн технологийг хөдөлмөрийн бүтээмж болгосноор хөгжиж буй орнууд өндөр хөгжилтэй орноос илүү ашиг тус хүртэж байгаа нь тогтоогдсон байна.

Даяарчлалыг хэдийгээр болзошгүй сөрөг үр дагавраар нь шүүмжилдэг ч, үүнээс бий болж буй хамгийн том боломж нь мэдлэг, технологийн тархац юм. Гэхдээ энэ нь дангаараа хангалтгүй. Гаднын мэдлэгийг нутагшуулах, үр ашигтай ашиглах чадавх бий болгоход боловсрол, хүмүүн капитал, дотоод судалгаа хөгжүүлэлтэд чиглэсэн хөрөнгө оруулалт, шинжлэх ухаан, инженерийн ноу-хау маш чухал. Түүнчлэн зохион бүтээгч нарт зардлаа нөхөх боломжийг нь олгон, дотоод, гадаадын оюуны өмчийн эрхийг тодорхой түвшинд хамгаалж, хүндэтгэх шаардлагатай гэдгийг ОУВС анхааруулж байна. Мөн шинийг санаачлагч компаниуд зах зээлийг хэт хянаж, хэрэглэгчдэд хохирол учруулж, шинээр олж авсан технологийг урвуулан ашиглахгүй байх нөхцөл бүрдүүлэхийн тулд бодлого тодорхойлогчид даяаршлын болон технологийн шинэчлэлийн эерэг үр дүнг хүн амын дунд өргөн хүрээнд хуваалцах ёстой хэмээжээ. Бодлогын талаасаа бусад улс орнуудтай харилцаагаа сайжруулах үүднээс гадаадын шууд хөрөнгө оруулалтын хатуу заалтуудыг зөөллөн, худалдааны саадыг арилгаж, шаардлагатай дэд бүтэц бий болгосноор гадаад мэдлэгийн урсгалыг бий болгодог байна.

A

Жижиг

A

Дунд

A

Том

Эндрюсийн хэдэн жилийн аяллыг 20 хоногт гүйцээсэн төмөр хүлэг

​Монголын нутгаар аялж буй 35 хүнтэй экспедиц 1600 гаруй километр туулжээ​

 0 сэтгэгдэл


Улаанбаатар, Монгол улс

Бараг зууны тэртээ Америкийн адал явдал хайгч Рой Чэпмен Эндрюс Монголын говьд анхныэкспедицээ удирдан орж ирэхдээ Dodge машины цуваатай байлаа. Хоёрхон оронтой тоогоор илэрхийлэгдэх хариугүй хүч бүхий мотортой, дээвэргүй бүхээгт машин байсхийгээд хэд хоногоор шаварт суучихна. Машинууд газар нутгийн хүчир нөхцөлийг удаан туулсан ч гэлээ аялал бүхэлдээ үр дүнтэй болсон юм. түүний Баянзагаас олдсон чулуужсан өндөгтэй үүр нь үлэг гүрвэл мөлхөгч амьтан байсныг хүн төрөлхтөнд ойлгуулж өгсөн байдаг. Хэрэг дээрээ тэмээг төмөр хөлгөөр орлуулсан нь дэлхийн алслагдмал өнцөгт ачааны машин, шинжлэх ухааны хайгуул дараагийн зуун жилдээ нягт холбоотой байхыг зөгнөсөн хэрэг байв. Харин энэ зун Infinity Motor компани бооцоо тавилаа. урьд нь хүрэх аргагүй байсан газар нутгийг хиймэл дагуул, дрон, дулааны зураг зүйн технологиор зураглахаар хамтарч буй Монголын палеонтологийн хүрээлэн, хонконгийн хайгуулчдын клубт тус компани хүнд хүчир нөхцөлд зориулагдсан SUV машинаа нийлүүлэв. Infiniti QX80 хөлөглөн Монголын нутгаар аялж буй 35 хүнтэй экспедиц 1600 гаруй километр туулжээ.

Тус экспедиц Эндрюсийн хэдэн жилийн аяллыг 20 хоногт гүйцээх юм.Дөрвөн дугуйн хөтлүүр, 400 морины хүчтэй V8 хөдөлгүүртэй машин америкийн байгалийн түүхийн музейн захирал байсан, Индиана Жонсын эх дүр цуцашгүй хайгуулч Эндрюст чухам сайхан эд байх байлаа. Харин Infiniti-ийн хувьд уг арга хэмжээ нь өргөжиж буй тансаг зэрэглэлийн автомашины зах зээлд сурталчилгаа өрнүүлэх боломжийг гярхай анзаарсан хэрэг. Хамгийн орчин үеийн зам нь хүртэл хөдөөгийнх шиг Монголын төвийн бүс нутаг дахь шавар, элс, намгархаг нугатай бартаат гадаргыг SUV машин торохгүй туулжээ. Аяллын дүнд экспедиц чулуужсан олдвортой 250 газар, үлэг гүрвэлийн гурван болзошгүй шинэ төрөл зүйл илрүүлэв. Шинээр илэрсэн тарбозаврын шүд, велосирапторын хэнхэрцэг хоёрыг 70 сая жилийн настай хэмээн таамаглаж байна. Японд Lexus, Acura-гийн дараа гуравдугаарт ордог тансаг брэнд Infiniti нь Монголд дилерийн сүлжээгүй. Гурван сая хүн амтай Монголд шоу танхимаа Mercedes-Benz, Porsche хоёр саяхан нээсэн бол BMW 2019 онд нээх төлөвлөгөөтэй. Монголын шинэ автомашины зах зээл жижигхэн, жилдээ 2000 ч хүрэхгүй борлуулалттай. Гэхдээ дээд зэрэглэлийн SUV машины хэрэглээ ихэссээр байгаа Монголын зах зээлийн боломжийг авто үйлдвэрлэгчид ч анзаарч эхэллээ.

A

Жижиг

A

Дунд

A

Том

БНХАУ автомат жолоодлоготой шумбагч онгоцны флот байгуулна

 0 сэтгэгдэл


БНХАУ хүний оролцоогүй автомат жолоодлоготой шумбагч хөлгийн флотыг Ази тивийн далай тэнгисийн бүсэд ашиглахаар төлөвлөж байна. Хятадын ардын чөлөөлөх армийн зэвсэглэлд багтах шинэ флот нь “тагнуулын мэдээлэл цуглуулахаас тэсрэг төхөөрөмж суурилуулах, эсрэг талын байлдааны хөлгийг тэсэлж устгах хүртэлх өргөн цар хүрээтэй үүрэг” гүйцэтгэнэ хэмээн Хонконгийн South China Morning Post (SCMP) сонин мэдээлэв. Бээжингийн төлөвлөгөөгөөр Хятадын байлдааны зориулалттай, анхны автомат шумбагч хөлгийг 2020 онд уснаа тавина. SCMP-ийн мэдээллээс үзвэл ийм шумбагч “цөмийн зэвсэггүй”. Хиймэл оюун ухаан бүхий жолоодлогын систем шумбагчийн маневр, шумбах гүн зэргийг тооцоолж, ойролцоох бусад хөлгийг ялган тодорхойлно. Жолоодлогын хүмүүн баг шаардлагагүй ийм шумбагч хөлгийн флот нь БНХАУ, Япон, Вьетнам зэрэг улс хооронд маргаантай байдаг тэнгисийн бүсэд эргүүл хийх юм.

АНУ-ын ижил төстэй арга хэмжээний хариуд Хятадууд төсөл хэрэгжүүлж буйн учрыг Хятадын шинжлэх ухааны академийн дэргэдэх шэньяны автоматжуулалтын хүрээлэнгийн захирал Лин Ян тайлбарлаж байна. Пентагоны харьяа DARPA агентлаг оны эхээр АНУ-ын тэнгисийн цэргийн хүчинд шумбагч эсэргүүцэх туршилтын жолоочгүй хөлөг буюу ASWACTUW загвар нийлүүлжээ. Туршилтын эцэст “тэнгисийн ангууч” далай тэнгист нэг удаад гурав хүртэлх сарын хугацаагаар хүний оролцоогүй үүрэг гүйцэтгэдэг болно. АНУ автомат жолоодлого бүхий шумбагч хөлөг бүтээж хөгжүүлэхээр хоёр ч том гэрээлэгчид захиалга өгчээ. Lockheed Martin-ы Orca, Boeing-ийн Echo Voyager хэмээх төсөл 2020 он гэхэд бүрэн хэрэгжинэ. “Бүх ажиллагаа автомат удирдлагатай өрнөх нөхцөлд та бид бүгд үзэгч болж хувирна.

Улс төрийн зорилгод ч үйлчлэхгүй. Зөрчил мөргөлдөөн гээч нь хүмүүний шийдвэрээр бий болдог нийгмийн бэрхшээл” хэмээн АНУ-ын Батлан хамгаалахын сайд Жим Мэттис тайлбарлаж байв. Хиймэл оюунтай зэвсгийг хориглохоор НҮБ-д хандсан захидалд гарын үсэг зурсан хүндтэй захирлуудын нэг Илон Маск ч мөн адил байр суурьтай. “Үхлийн уршиг бүхий автомат зэвсэг нь дайн байлдаанд гурав дахь хувьсгал авчирна. Нэгэнт хөгжсөн зэвсгийг өргөн цар хүрээтэй зэвсэгт мөргөлдөөнд ашиглахыг зөвшөөрчихвөл хүмүүс сэхээ авч амжихаас өмнө өрнөж дуусна. Ийм зэвсгийг дарангуйлагч нар, алан хядагчид гэм буруугүй хүмүүсийн өөдөөс ашиглаж мэднэ. Хугацаа бага үлдлээ. Пандорын хайрцаг нэг л онгойчихвол эргүүлж хаахад хэцүү” хэмээн уг захидлыг бичигч нар анхааруулж байна.