A

Жижиг

A

Дунд

A

Том
http://zgm.mn/post/1131/

Ц.Энхтүвшин: Дотоодын эрчим хүчний зах зээлийн эрэлт ханасан

​Энэ онд хоёр сая тонн нүүрс олборлож, борлуулахаар төлөвлөсөн​

 0 сэтгэгдэл

A

Жижиг

A

Дунд

A

Том
http://zgm.mn/post/1131/


“Шивээ Овоо” хувьцаат компанийн гүйцэтгэх захирал Ц.Энхтүвшинтэй ярилцлаа.

-“Шивээ овоо” компанийн борлуулалт, олборлолт энэ онд ямар үзүүлэлттэй байна. өвөлжилтийн бэлтгэл ажлаа одоогоор хэдэн хувьтай хангаж байгаа вэ?

-Энэ оны хувьд хоёр сая тонн нүүрс олборлож, борлуулахаар төлөвлөсөн. Одоогоор 1.2 сая тонн нүүрс олборлож, борлуулаад байна. Үлдсэн хугацаанд 860 мянга орчим тонныг олборлож борлуулахаар зорьж байгаа. Өнөөдрийн байдлаар өвөлжилтийн бэлтгэл ажил 64 хувьтай байна. Төлөвлөлтийн дагуу ажлаа хийж байгаа ч зарим нь мөнгө санхүүгийн асуудлаас болоод хойшлогдсон. “Эрдэнэс Монгол” компани манай компанид зээл олгосон. Тус зээлийн хүрээнд бид хөрөнгө мөнгөний асуудлаа шийдэж, ирэх сарын 1-ний өдөр гэхэд өвөлжилтийн бэлтгэл ажлыг 100 хувьд хүргэхээр төлөвлөсөн.

-Технологийн шинэчлэл хэр зэрэг хийсэн бэ?

-Уул уурхайн салбарт технологийн шинэчлэл чухал шаардлагатай. Манай компанийн нийт тоног төхөөрөмжийн 40 гаруй хувь нь ашиглалтын хугацаа дууссан хүндрэлтэй байгаа. Бид өөрсдийн боломж бололцоогоор “Эрдэнэс Монгол” компани болон Засгийн газрын дэмжлэгээр зарим ажлыг хэрэгжүүлж байна. Тухайлбал, он гарснаас хойш нэн шаардагатай байсан тэсэлгээний машиныг лизингээр шийдсэн. Мөн дөрвөн технологийн автомашин шинээр худалдаж авсан. Эдгээрийг санхүүгийн зээлээр зохицуулсан ч бүх асуудлаа шийдэж чадсангүй. Тийм боломж ч байсангүй.

-Дотоодын эрчим хүчний нүүрс олборлож, нийлүүлдэг компаниуд орлогоос илүү зардал өндөртэй байдаг гол бэрхшээлтэй. энэ асуудлыг шийдэх арга зам байдаг уу?

-Бидэнд тулгардаг үндсэн асуудал үнийн бэрхшээл нь байдаг. Нэг тонн нүүрс олборлож, борлуулахад үнэ нь зардлаасаа бага гардаг. Ийм учраас борлуулалтын нэг тонн нүүрс тутамд компани алдагдал хүлээх болдог. Зах зээлийн зарчмаар ашигтай ажиллахын тулд үнэ нь зардлаасаа өндөр байх ёстой. Зах зээлд үнийг чөлөөлөөгүй цагт үүнийг шийдэх боломжгүй. Түүнчлэн 10 гаруй жил ярьж байгаа цахилгаан станцын болон уурхайг түшиглэсэн том төслийг хэрэгжүүлэхгүйгээр үүнийг шийдэж чадахгүй.

-Энэ жил төдийгүй ирэх жилээс “Шивээ овоо”-гийн борлуулалтад ямар нэгэн өөрчлөлт орох уу?

-Нэг жилд хоёр сая орчим тонн нүүрс дотоодын зах зээлд олборлодог. үүний 86 хувийг ДЦС-4-д нийлүүлдэг. Эднийх дотоодын эрчим хүчний үйлдвэрлэлийн 70 хувийг дангаараа хангадаг. Энэ компанийн 50.9 хувийг бид нийлүүлдэг гэсэн үг. Манай улсын дотоодын зах зээл дээрх нийт эрчим хүчний нүүрсний хэрэглээ жилд 7.5 сая тонн орчим байдаг. үндсэндээ энэ зах зээл ханасан. Хэрвээ эрчим хүчний шинэ эх үүсвэр бий болж, цахилгаан станц баригдахгүй бол эрчим хүчний нүүрс борлогдох дотоодын зах зээл байхгүй. Иймд борлуулалтаа нэмэгдүүлж, эдийн засгийн хүндрэлээ шийдэх боломж одоогоор харагдахгүй байна.

-Эрчим хүчний нүүрс олборлолтод технологийн дэвшил ашиглах боломж хэр байдаг вэ?

-Дотооддоо нүүрсний тээвэрлэлтэд л дамжлагын систем ашиглаж байсан бол хөрс тээвэрлэлтэд дамжлагын системийг ашиглах судалгаа хийж байна. Мөн үр ашиггүй зардлаа танах, дотоодын өрсөлдөх чадварыг нэмэгдүүлэхээр анхаарч ажилладаг. Гэхдээ нүүрсний борлуулалтын зах зээлийг нэмэгдүүлэх зайлшгүй шаардлагатай байна.

-Эрчим хүчний нүүрснээс гадна коксжих нүүрсний экспортын тээвэрлэлтийн зардлаа хамгийн их хэмнэх боломжтой ч чадахгүй байгаа. Үүнийг юу гэж бодож байна вэ. Гарц, шийдэл бий юу?

-Нүүрсний салбарын хамгийн том чуулга уулзалт болох “Coal Mongolia” арга хэмжээний үеэр энэ талаар бас хэлэлцсэн. Чуулган дээр хамгийн их харагдсан илтгэлүүд бол коксжих нүүрсний экспортын тээврийн асуудлыг шийдэх, экспортод гаргах гарцаа нээх юм. Үүнийг би хамгийн зөв бөгөөд ойрын хугацаанд хэрэгжих бодит гарц гэж бодож байна

A

Жижиг

A

Дунд

A

Том

АНУ бүх төрлийн онлайн мөрийтэй тоглоомыг хориглов

 0 сэтгэгдэл


Холбооны хууль бүх төрлийн интернэт мөрийг хориглосон талаар АНУ-ын Хууль Зүйн Яам мэдэгдсэн. Энэ нь 50 жилийн тэртээ баталсан, зөвхөн спортын тэмцээний мөрийг хориглосон хуультай холбоотой байр сууриа өөрчилж буйн нотолгоо болов.

Хуучин хуулийг халах саналыг АНУ-ын Хууль зүйн яамны харьяа, хууль бус мөрийтэй тоглоомтой тэмцэх салбар гаргасан юм. АНУ-д 1961 онд баталсан Wire Act нэртэй хуулиар спортын тэмцээний мөрийг хориглосон явдлыг ташаа ойлгож ирсэн тухай 23 хуудас тайлбарыг тус яамны Хуулийн зөвлөх оффисоос долоон жилийн өмнө гаргасныг даваа гарагт нийтэд ил болгожээ. Wire Act нь интернэт мөрийг бус, зөвхөн спортын тэмцээний мөрийг хориглосон утгатай хэмээн АНУ-ын Хууль Зүйн Яам тайлбарласан юм. Шинэ тайлбар нь хуулийн үйлчлэх хүрээтэй холбоотой засгийн газрын байр суурийг шүүгч нар хэрхэн авч үзэхтэй холбоотой шалгуур болно хэмээн тус яам үзэж байна. Долоон жилийн өмнө буюу 2011 онд гарсан тайлбараас хойш сугалааны тасалбарыг онлайн борлуулж, казино эрхлэгчид онлайнаар мөрий тавьдаг болсон нь ч шинэ тайлбартай уялдан өөрчлөгдөж болзошгүй.

Хууль Зүйн Яам 2011 онд гаргасан шийдвэрээ эргэн харж үзэх лоббиг казино эрхлэгч тэрбумтан Шелдон Аделсон тэргүүтэй эвсэл 2017 оноос өрнүүлж эхэлсэн юм. Тус яамнаас гаргасан шийдвэр нь АНу-ын муж улсууд онлайн мөрийтэй тоглоомыг зөвшөөрөх нөхцөл бүрдүүлжээ.

A

Жижиг

A

Дунд

A

Том

Азийн хувьцаанд дарамт хэвээр

 0 сэтгэгдэл

A

Жижиг

A

Дунд

A

Том

Томуугийн дэгдэлт инфляц өсөхөд нөлөөлжээ

Эм, тариа улирлын шинжтэй үнийн өсөлтөд жин дарж байна

 0 сэтгэгдэл


Утааны улиралтай зэрэгцэн дэгддэг томуу, томуу төст өвчний тархалт эмч, эмнэлгүүдийн ачааллыг нэмэхээс гадна иргэдийн санхүүд ч дарамт болж байгаа нь статистикийн мэдээллээс харагдаж байна. Өнгөрсөн оны 12 дугаар сарын байдлаар эм, эмнэлгийн үйлчилгээний төлбөр иргэдийн хэтэвчинд мах, нүүрсний үнийн өсөлтөөс дутуугүй дарамт болжээ.

Эдгээр төрлийн бараа, үйлчилгээний үнийн өсөлт 12 дугаар сард инфляц 8.1 хувьтай гарахад жин дарсан аж. ҮСХ-ны мэдээлснээр инфляцад орон сууц, ус, цахилгаан түлшний үнэ өмнөх оны мөн үеэс 16.3 хувиар, харин эм, тариа, эмнэлгийн үйлчилгээний төлбөр 11.4 хувиар өсөхөд голлон нөлөөлсөн байна.

Үүнээс гадна шинэ жилийн баярын арга хэмжээтэй холбоотойгоор согтууруулах ундаа, тамхи, хүнсний бараа, ундаа хэрэглээний үнийн өсөлтөд нөлөөлсөн. Уг нь эм, тариа, эмнэлгийн үйлчилгээний үнэ иргэдийн хэрэглээний сагсанд 3.6 хувийг буюу маш бага жин дардаг.

Гэхдээ улирлын шинжтэй инфляцад мах, хүнсний ногоо, нүүрсний үнээс гадна эм, эмнэлгийн үйлчилгээний үнэ хүйтний эрч чангарч, томуугийн вирус дархлаа дарангуйлдаг үетэй зэрэгцэн өрхийн санхүүгийн дархлааг ч бууруулж байна. Харин өнгөрсөн сард өргөн хэрэглээний шатахууны үнийг литр тутамд нь 150 төгрөгөөр бууруулсан нь тээврийн бүлгийн үнэ өнгөрсөн оны 11 дүгээр сараас 0.6 нэгжээр буурахад нөлөөлжээ. Гэхдээ өнгөрсөн оны турш шатахууны үнэ хэд хэдэн удаа нэмэгдсэнээр нь тээврийн бүлгийн үнэ 2018 оны эхнээс 9.7 хувиар өссөн байгаа юм.

МАЛ АЖ АХУЙН САЛБАРЫН ӨСӨЛТ ИЛТ СААРЧЭЭ

Эдийн засгийн 12 дугаар сарын үзүүлэлтүүдийг харахад 2018 онд эдийн засгийн өсөлт мөн оны гуравдугаар улирлын түвшинд хадгалагдах болов уу хэмээн албаныхан таамаглаж байна. ҮСХ-ны мэргэжилтнүүдийн онцолж буйгаар эдийн засгийн голлох салбар болох уул уурхайн нөхцөл байдал тогтвортой байгаа ч хөдөө аж ахуйн салбарын өсөлт хүлээлтэд хүрээгүй аж. Өнгөрсөн жил нийт малын тоо толгой 240.3 мянга буюу 0.4 хувиар нэмэгдсэн нь өмнөх жилүүдтэй харьцуулахад бараг 10 дахин бага өсөлт болж байна. 2018 оны эхний дөрвөн сард өвөлжилт, хаваржилт хүндэрсэн, бэлчээрийн доройтол, халдварт өвчний дэгдэлт өндөр байсан зэрэг шалтгаанаар малын зүй бус хорогдол 2.6 сая буюу дөрвөн хувьтай байсан байна. Үүнээс гадна төллөх насны мал олноороо хээл хаясан нь цөөхөн төл авахад нөлөөлжээ.

• Өнгөрсөн оны 12 дугаар сарын байдлаар эм, эмнэлгийн үйлчилгээний төлбөр иргэдийн хэтэвчид мах, нүүрсний үнийн өсөлтөөс дутуугүй дарамт болжээ. 

• Малын тоо толгойн өсөлт дундаж өсөлтөөс 10 дахин бага, зүй бус хорогдол ихсэв. 

• Төсвийн урсгал зардал 304.8 тэрбум төгрөгөөр өссөн нь зарлага тэлэхэд хүргэжээ.

Хээл авсан нийт малын 90 орчим хувь нь төллөдөг байсан ч өнгөрсөн онд 60-70 хувь нь төллөсөн гэдгийг албаныхан хэллээ. Харин газар тариалангийн салбарт хэдийгээр тариалалтын талбайн хэмжээ багассан ч нэгж талбайгаас авах ургацын хэмжээ харьцангуй өндөр байсан байна.

ГАДААД ХУДАЛДААНЫ АШИГ 39 ХУВИАР БУУРАВ

12 дугаар сард гадаад худалдааны тэнцэл 27.2 сая ам.долларын ашигтай гарч, өмнөх оны мөн үеэс 53.9 сая ам.доллар буюу 66.2 хувиар өссөн. Харин жилийн дүнгээр нь авч үзвэл 1.1 тэрбум ам.долларын ашигтай гарсан нь 2017 оныхоос 726.5 сая ам.доллар буюу 39 хувиар буурсан үзүүлэлт. Үүнд импорт 35.5 хувиар, экспорт 13.1 хувиар тус тус өсчээ. Экспортод гарч байгаа эрдэс бүтээгдэхүүн 1.1 тэрбум, нэхмэл бүтээгдэхүүн 74.3 сая ам.доллараар голлон өссөн бол импортын өсөлтөд дизелийн түлш, машин тоног төхөөрөмж, тэдгээрийн сэлбэг хэрэгслийн худалдан авалт жин дарсан байна. Өнгөрсөн онд экспортод гарсан нүүрсний дундаж үнэ тонн нь 60 ам.доллар байсан бол зэсийн баяжмал биет хэмжээгээр 0.5 сая тонноор буурсан ч үнэ нь тонн тутамдаа 40 орчим хувиар нэмэгдсэн. Энэ нь экспортын орлого өсөхөд гол нөлөө үзүүлжээ.

Харин 2018 оны төсөв урьдчилсан гүйцэтгэлээр 11.9 тэрбум төгрөгийн ашигтай гарсан ч нэгдсэн төсвийн зарлага, эргэж төлөгдөх цэвэр зээлийн хэмжээ өмнөх оныхоос 205.6 тэрбум  төгрөг буюу 2.3 хувиар өссөн байна. Хэдийгээр хүүгийн болон хөрөнгийн зардал, татаас, эргэж төлөгдөх төлбөрийг хассан цэвэр зээл тус бүр буурсан ч урсгал зардал 304.8 тэрбум төгрөгөөр өссөн нь төсвийн зарлага тэлэхэд хүргэжээ.

ЗГМ: Тодруулга

Инфляцын 30 хувь импортоос хамаарч байна

Улирлын шинжтэй инфляцын өсөлтөд юу нөлөөлсөн талаар ҮСХ-ны Эдийн засгийн статистикийн хэлтсийн статистикч Д.Баасангаас тодрууллаа

-Шатахууны үнийг бууруулсан ч өргөн хэрэглээний барааны үнэ эргээд буурдаггүй. Энэ нь албан ёсны тоон мэдээлэлд хэрхэн тусаж байна вэ?

-Инфляцын 8.1 хувийн өсөлтийн 30 орчим хувь импортын бараа бүтээгдэхүүнээс хамаарч байна. Үүнд валютын ханш болон шатахууны үнийн өсөлт нөлөөлсөн гэсэн үг. Шатахууны үнэ гэхэд 2011 оноос хойш 21 удаа нэмэгдэж, 15 удаа буурсан. Өөрөөр хэлбэл, зургаан удаагийн өсөлт хадгалагдаж байгаагаас үнэ нь өссөн хэмжээгээрээ эргэж буурдаггүй гэсэн дүгнэлт хийж болно. Үүнээс гадна, манай улсын төлбөрийн чадвар муудаж байгаа нь төгрөгийн ханшийг сулруулж байна.

-Махны үнэд жилийн турш ямар өөрчлөлт ажиглагдав?

-Өнгөрсөн жил нэгдүгээр сараас хойш махны төрөл тус бүр кг тутамдаа 200-700 төгрөгрөөр нэмэгдэж, 7-8 дугаар сард эргээд буурсан байна. Харин өмнөх жилүүдийн хувьд 1-3 дугаар сард махны үнэ нэмэгддэг, 5-6 дугаар сард буурдаг зүй тогтол байсан бол 2018 онд үнэ буурах үе нэг сараар хойшилсон. Энэ нь малын тарга тэвээрэг сайтай байсан. Орон нутагт малын нядалгааны цэгтэй болж, худалдаачид махаа зөвхөн Улаанбаатарт бус зам дагуух худалдааны төвүүдэд өгдөг болсон гээд тээвэр ложистикийн өөрчлөлттэй холбоотой. Малчны хотноос шууд авсан малын махыг яг нийслэлд авчирч байгаа эсэх нь эргэлзээтэй байна. Яагаад гэвэл хомсдол бий болж байна шүү дээ. Махны үнэ өнгөрсөн оны 10-11 дүгээр сард буюу хүмүүсийн идшээ бэлтгэдэг үеэр эргээд өссөн. Үүнээс гадна иргэдийн хэрэглээний сагсанд өөрчлөлт орж байна. Тухайлбал, далайн байцайны болон лаазалж, нөөшилсөн бүтээгдэхүүний үнэ өсөж байгаа. Мөн гурил, гурилан бүтээгдэхүүний нэр төрөл нэмэгдэж, иргэдийн хүнсний уламжлалт хэрэглээ өөрчлөгдөж байгаатай холбоотойгоор хэрэглээний үнийн сагсан дахь хүнсний бараа бүтээгдэхүүний үнэд өөрчлөлт орж байна.

A

Жижиг

A

Дунд

A

Том

Хятадын банкууд гибрид зах зээлд $22 тэрбумыг гаргана

 0 сэтгэгдэл